रायगड पोलीस दल कोरोनाच्या विळख्यात

पोलीस अधीक्षक अशोक दुधे यांच्यासह 11 पोलीस अधिकारी, 104 कर्मचाऱ्यांना कोरोनाची लागण

सिटी बेल | रायगड | धम्मशील सावंत |

महाराष्ट्रात तिसऱ्या लाटेत कोरोनाच्या रुग्णसंख्येत मोठी वाढ होत आहे, रायगड जिल्ह्यात देखील कोरोनाच्या रुग्णसंख्येत झपाट्याने वाढ होत असून रायगड पोलीस दलाला कोरोनाने विळखा घातला आहे.

रायगड जिल्ह्याची सुरक्षा व जबाबदारी ज्यांच्या खांद्यावर आहे, अशा पोलीस बांधवाना कोरोनाने घेरले आहे. पोलीस अधीक्षक अशोक दुधे यांच्यासह 11 पोलीस अधिकारी व 104 कर्मचाऱ्यांना कोरोनाची लागण झाली आहे. त्यामुळे चिंता व्यक्त करण्यात येत आहे. कोरोनाची लागण झालेल्या मध्ये पोलीस अधीक्षक अशोक दुधे यांचा ही समावेश आहे. या सर्वांची प्रकृती स्थिर असल्याची माहिती अप्पर पोलीस अधीक्षक अतुल झेंडे यांनी दिली.

पोलीस दलात कोरोनाने जोरदार एन्ट्री केल्याने पोलीस प्रशासन सतर्क झालेय, पोलीस अधीक्षक कार्यालयासह अन्य पोलीस स्थानकात पोलिसांची अँटीजन टेस्ट करण्यात येत आहे.पहिल्या लाटेत देखील 595 कर्मचारी व त्यांच्या नातेवाईकांना कोरोनाची लागण झाली होती.