सिटी बेल | उरण | अजित पाटील |
ग्रंथालय शास्त्राचे जनक डॉ.एस.आर. रंगनाथन यांच्या जयंतीनिमित्त रयत शिक्षण संस्थेच्या फूंडे येथील वीर वाजेकर महाविद्यालयातील ग्रंथालय विभागाच्या वतीने राष्ट्रीय ग्रंथपाल दिन मोठ्या उत्साहात साजरा करण्यात आला.
महाविद्यालयाचे प्रभारी प्राचार्य डॉक्टर साहेबराव ओहोळ यांच्या हस्ते रंगनाथन यांच्या प्रतिमेस पुष्पहार अर्पण करून अभिवादन करण्यात आले. यावेळी सकाळ सत्राचे प्रमुख महाले सर, दुपार सत्राचे प्रमुख घोरपडे सर, ग्रंथालय कमिटीचे सदस्य, विविध विभागांचे विभाग प्रमुख आणि इतर प्राध्यापक आदी मान्यवर उपस्थित होते.
या ग्रंथालय दिनाचे औचित्य साधून भारतीय साहित्यातील सर्वोच्च समजला जाणारा ज्ञानपीठ पुरस्कार आतापर्यंत ज्या मराठी लेखकांना मिळाला आहे त्यांच्याविषयी “ज्ञानपीठ पुरस्कारप्राप्त मराठी सारस्वत”असे प्रदर्शन आयोजित करण्यात आले होते. कार्यक्रमाचे प्रास्ताविक करत असताना ग्रंथपाल सुप्रिया नवले यांनी रंगनाथन यांच्या कार्याची ओळख आणि ज्ञानपीठ पुरस्कार प्राप्त मराठी लेखकांची अधिक माहिती दिली.
आपल्या अध्यक्षीय मनोगतामध्ये महाविद्यालयाचे प्रभारी प्राचार्य साहेबराव ओहोळ राष्ट्रीय ग्रंथपाल दिनाची संकल्पना स्पष्ट करताना म्हणाले की,भारतात ग्रंथालय शास्त्राची मुहूर्तमेढ रोवणारे डॉ. एस. आर. रंगनाथन यांचा जन्मदिवस 12 ऑगस्ट हा ग्रंथपाल दिन म्हणून साजरा केला जातो. वाचन संस्कृती टिकावी आणि ती वृद्धिंगत व्हावी यासाठी ग्रंथालयांना पर्याय नाही, असे सांगून शैक्षणिक क्षेत्रातील ग्रंथालयांचे महत्त्व अधोरेखित केले.
कोविड-१९ विषयक शासन नियमांचे पालन करत पार पडलेल्या या छोटेखानी कार्यक्रमात सर्वात शेवटी ग्रंथपाल सुप्रिया नवले यांनी आभार मानले. या कार्यक्रमाच्या यशस्वितेसाठी नर्मदा रोज, कमल बंगारे काका, जोशी काका यांनी परिश्रम घेतले.
Be First to Comment