जागर
अश्विनातली शुद्ध प्रतिपदा
पुण्यप्रद अति सुंदर
जगदंबा बसता ध्यानाला
भक्तीरसाचा जागर.
पंचामृताचे स्नान करुनी
घटी बसली आदिमाया
सौहार्दाचे लावून अत्तर
झाली सुगंधित काया.
अखंड नंदादीप लावूनी
तमास सारु या दूर
धूप, दीप, नैवेद्य, आरतीने
आनंदाला येई पूर.
नऊ रुपांतून नऊ रंग लेवूनी
घटी बसते जगज्जननी
स्त्रीशक्तीचे सामर्थ्य दाविते
रेणुका माय भवानी.
शैलपुत्री ती ब्रह्मचारिणी
भुवनेश्वरी ती विंध्यवासिनी
उमा, रमा, चंडिका, सती ती
दुर्गा, काली अन सरस्वती.
अनेक रुपे, नामे घेऊनी
धावून येई भक्तांसाठी
महिषासुरमर्दिनी होऊनी
उभी ठाकते भक्तांपाठी.
घटांतूनी बीजांकूर येता
सृजन सोहळा होई पूर्तता
नऊ दिवसांचे होई पारणे
सप्तशती जप होम हवने.
पदर पसरुनी मागू जोगवा
नामजपातून मिळे गोडवा
मनीमानसी मातेचे चिंतन
हृदयमंदिरी नाद घुमावा.
अंतरंग मग उजळून येते
कळीकाळाचे भयही सरते
विजयादशमीस विजयी करुनी
जगदंबा जणू प्रसाद देते.
सौ. अपर्णा साठे., नवीन पनवेल
Be First to Comment