श्रावणगीत

श्रावणगीत

हिरव्या कोमल अनुरागे, धरतीचे स्रवले पान्हे |
श्रावणातल्या जलधारांनी खुलते माझे गाणे ||

मंगलमय मणिबंध घेउनी, वसुंधरेला अर्पण करुनी |
परमानंदे मेघ नाचती, पाहुनि रूप सुखाने ||१||

निर्झरिणी पखवाज घुमविती, दिव्य रुपेरी मोती उधळिति|
गिरि-कुहरातुन नर्तन करिती, मोदे गात तराणे ||२||

मधें चमकता रेशिमधारा, नाचे उभवुनि भव्य पिसारा|
इंद्रधनूचे स्वागत करितो मयूर आनंदाने ||३||

शीतल वायू कोठुन आला, मंद धुंद मधुगंध पसरला |
त्या श्वासाने मोहित प्राची उजळे नव तेजाने ||४||

पारिजात हा बहरुन आला , धवल सुमांजलि अर्पि धरेला |
तारकाच जणुं उतरुन आल्या, उधळित स्तुति-सुमने ||५||

कधी गर्जती मेघ धुरंधर, सुवर्णरेखा चमके क्षणभर |
मल्हाराचे स्वर निनादता
केले हास्य धरेने ||६||

सुजल-सुफल हे रूप मनोहर, जणु अवतरला स्वर्ग धरेवर |
चराचरातुन प्रसन्न कण-कण गाती एकसुराने ||७||

मनोहर काजरेकर,

मु.पो. जांभवडे, ता. कुडाळ