चाहूल दवबिंदूंची

चाहूल दवबिंदूंची

भल्यापहाटे मधुबिंदुंची माळ केशरी ओघळली
टपटप सुमने अवनीवरती हिरवी सृष्टी सुखावली

सांगे वारा गोड गुपित
फुलेल आता शेवंती
पवना संगे झोके घेती
तीळ फुलांची दंगामस्ती
सप्तरंगी झिरमिर झिरमिर भुई सोनसळा पांघरली.

नील गुलाबी रंगांतुनी
सरोवरांची शोभा फुलली
हिरव्या गोल पर्णदळावर
अलिप्त कमळे तरंगली
वाऱ्यासंगे परिमळ पसरे भूमी सुगंधे दरवळली

शेतामध्ये नवान्न आले
रानपाखरे चिवचिवती
कणसे ओंब्या खाली झुकती
दान सुगीचे भू वरती
दारी लावली तोरणमाळ प्रसन्न लक्ष्मी प्रकाशली.

सुजाता खरे., नवीन पनवेल