आली दिवाळी

आली दिवाळी

दिवाळीची चाहूल लागताच
मनाला येतो अनोखा हुरूप
गृहिणीच्या स्वयंपाक घराला
येते रणभूमीचे स्वरूप

दिवाळीची साफसफाई आगळी
त्याची वाटते सर्वांनाच भीती
तिलाच वाटते करावीशी
बाकी कोणाचीच नसते संमती

पण यंदा घरातला कोपरा झाडताना
मनातल्या कोपऱ्यात वाकून बघूया
घरातली धूळ साफ करताना
तिथली ही धूळ पुसूया

पहिला दिवा घरी लावताना
कोणाच्या तरी घरच्या दिव्याचे कारण बनुया
दुसरा दिवा लावताना
ज्ञानाचा दिवा पण उजळूया

तिसरा दिवा जेव्हा प्रकाश देई
कोणाच्या तरी मार्गातला प्रकाश होऊ
चवथ्या दिव्याच्या रोषणाई ने
मनाचा अंधकार दूर करू

न घाबरता न डगमगता
करू दिवाळीची पूर्वतयारी
काळजीपूर्वक जवाबदरीने
साजरी करूया दिवाळी

डॉ. शिल्पा सप्रे-गोडबोले,
नवीन पनवेल