पितृपक्ष

पितृपक्ष

भादव्याचा कृष्ण पक्ष | म्हणती सारे पितृपक्ष|
कावळ्यावरी लक्ष | सर्व देती ||१||

पंधरवडा पितरांचा | पूर्वज स्मरणाचा |
मान पिंडाचा | काकस्पर्शाचा ||२||

वड आणि पिंपळ | प्राणवायू देती बक्कळ |
महत्त्व त्यांचे अढळ | जाणिले ऋषी मुनी ||३||

कावळे खाती फळे कोमल| अंकुरती त्यां पोटी निर्मळ |
कावळ्यांचाच तो मळ | वृक्ष रुजती सर्वदूर ||४||

भादव्याचा हा मास | काक प्रजनन ये जोरास |
त्यांच्या पोषक आहारास | ठेवू पितरांचा घास ||५||

सृष्टीचक्र सुरळीत ठेवावयास | सांगड घातली धर्मशास्त्रास |
ऋषीमुनींच्या सखोल ज्ञानास | परिणीती वृक्षसंवर्धनास ||६||

समजून घ्या ही निकड | निसर्ग अन् धर्माची सांगड |
विज्ञान जाणा अवघड | सोपे केले ऋषीमुनी ||७||

विनोदावर घाला आवर | कावळा वा पितरांवर |
जाणा कावळ्यांचा वावर | वागा पर्यावरणपूरक ||८||

स्वाती लेले, नवीन पनवेल