चालली गौराई

सोन्याच्या पाऊली | गौराई ती येते |
आनंदे भेटते | जीवलग ||१||

भोजनाचा थाट | हळदी कुंकू चा |
सण कौतुकाचा | लेकीसाठी ||२||

तिसऱ्या दिवशी | पाणी गं डोळ्यांत |
दही अन् भात | निरोपास ||३||

माहेरी समृद्धी | सुख आणि शांती |
मनाची श्रीमंती | आशिष दे ||४||

आई आमंत्रिते | पुढील वर्षीचे |
माहेर हक्काचे | परत ये ||५||

हिरव्या बांगड्या | शेवंतीची वेणी |
सौभाग्याची लेणी | शोभतसे ||६||

चालली गौराई | भरल्या ओटीने|
मोप समाधान | नेत्री दिसे ||७||

गौरींचा उत्सव | माहेरवाशीण |
संस्कारांचे ऋण | फिटेच ना ||८| स्वाती लेले, नवीन पनवेल