पाठवणी

पाठवणी

लेक जाता सासराला
जीव लागे टांगणीला
आत लवते प्राण ज्योती
लेक माझी लाडकी ती

स्वप्न पूर्तीच्या क्षणीही
कोणती हुरहुर उरी ही ?
मोकळे आभाळ व्हावे
का मनाला आवरावे ?

खेळ भांडी काल चार
खेळली नुकतीच पोर
गाठले मोठेपणाने
साधले हे मांडवाने

सांगते सुख मंत्र, बाळ
जोड घरच्यांशी ग नाळ
चार भिंतींचे नसावे
घर जिव्हाळ्याचे असावे

विहिण बाईना विनंती
अजुनही ओलीच माती
खास निगराणी करावी
नीव नात्याची भरावी

दृढ व्हावे गोड नाते
हे जसे ओवी नि जाते
साथ प्रेमाची मिळावी
वेल वंशाची फुलावी

निलिमा देशपांडे, नवीन पनवेल