होळी

होळी

होळी रुसली यंदाची
म्हणे जाळू नका वृक्ष
मांडणी करा खड्ड्यांची
अन् लावा त्यात वृक्ष

गाडून अमंगळाला
पसरा त्यावर माती
होळीच्या नवरूपाला
सुंदर विचार गाती

खमंग पुरणपोळी
असू द्यावी नैवेद्याला
श्रीफळ दिव्यांच्या ओळी
उजळू दे आरतीला

घेऊन चैत्र दारात
पळस मोगरा बिट्टी
रानीवनी शिवारात
रंग उधळण्यासाठी

शाश्वत हा रंगोत्सव
निसर्ग दावितो ठायी
जीवसृष्टीचा उत्सव
नेत्र दीपवितो बाई

अगणित रंगछटा
भडक फिका गडद
पांघरती वृक्षलता
सुमन पाने विविध

रंगोत्सव चिरंतन
ओळखून तो जपूया
तरुवेली संवर्धन
सृष्टी रक्षिण्या झटुया

नवसंकल्प होळीचा
मिळुनी सारे करुया
झालेला ऱ्हास धरेचा
उपवनांनी भरुया

… स्वाती लेले, नवीन पनवेल