मी पणती बोलते
मी पणती तेवते दारात
कोपऱ्यात, घर-अंगणात
न भपका, नाही भडका
मंद-शांत तेवणे माहीत...
थोडे तेल, कापसाची वात
मज पुरेसे उजळावयास
ठेवूनी अंधार स्वतः जवळी
जळते तुम्हा देण्यां प्रकाश...
जागा मज जास्त न लागे
कोपरा सुद्धा पुरेसा असतो
जेथे बसते तेथील अंधार
प्रज्वलित होता दूर सरतो...
मी पणती बोलते मानवा
संयमी-शांत वागणे चांगले
कर्माचे फळ ईश्वरां हाती
आपण तेवत राहणे चांगले...
©® कविश्री- अरुण दत्ताराम म्हात्रे.* नवी मुंबई, मो. 9987992519.
Be First to Comment