भाऊबीज

भाऊबीज

दिन आला भाऊबीज
प्रेम भरलं काळीज
वाटेवरी लावी डोळा
बंधू माझा गुणी भोळा

भाऊमाझा सीमेवर
देशासाठी सज्ज राही
नाही त्यास सणवार
तळ हाती जीव पाही

कार्तिक शुद्ध द्वितीया
झाला दिवाळी कळस
म्हणती यमद्वितीया
डोले दारात तुळस

भाऊ दिसे चंद्रामध्ये
आज त्यालाच औक्षते
पंचप्राणांच्या ज्योतीने
माझे आयु त्याला देते

प्रेम मायेचा गं टिळा
शोभे भावाच्या गं भाळा
आठवानं दाटे गळा
भिजे पदर सगळा

भाऊ येईलच घरी
तोच दसरा-दिवाळी
तोरण बांधूया गं दारी
ताईची माया ही आंधळी

स्वाती लेले, नवीन पनवेल