हे जीवन सुंदर आहे

हे जीवन सुंदर आहे

उजाड डोंगरी मेघ दाटले
ऊर धडधडे असे गरजले
अवचित अमृत बरसून गेले
मृदगंधाने श्वास भरले
पुन्हा एकदा उमगले
हे जीवन सुंदर आहे
सप्तस्वरांनी मैफिलीस भारले
कर्ण मधूर तराणे सजले
दृष्टिहीनाचेही डोळे निवले
पुन्हा एकदा उमगले
हे जीवन सुंदर आहे
निसर्गाचे अद्भुत देणे
हिमकड्यांचे कोरीव लेणे
निष्पर्ण वृक्ष मनी उदासले
वसंतासवे कुसुमित जाहले
पुन्हा एकदा उमगले
हे जीवन सुंदर आहे
ग्रीष्माची मी वाट चालले
थकली पाऊले शुष्क मी तहानले
पाणपोईत क्षणिक विसावले
दिव्यांग बालके हाती प्याले सारीले
पुन्हा पुन्हा एकदा उमगले
हे जीवन सुंदर आहे

डॉ.अंजली टकले, नवीन पनवेल