खालापूरात आश्रम शाळेच्या विद्यार्थ्यांना शैक्षणिक मदत, तहसिलदारांकडून कौतुक

सिटी बेल | खालापूर | मनोज कळमकर |

आदिवासी कुटुंबातील हुशार आणि गरजू दोन विद्यार्थ्यांना शैक्षणिक दत्तक घेण्याचा अभिनव उपक्रम दिलासा फाउंडेशन खालापूर यांनी सुरु केला असून शुक्रवारी तहसीलदार इरेश चप्पलवार आणि मान्यवरांच्या उपस्थितीत विद्यार्थ्यांना धनादेशाचे वाटप करण्यात आले.

तालुक्यातील डोलवली आदिवासी आश्रम शाळेत इयत्ता दहावीत शिकणाऱ्या अनिल कानू सप्रे आणि बबलू नथू वारघडे ह्या दोन हुशार व गरजू विद्यार्थ्यांना शैक्षणिक मदत करण्याचे हेतूने शैक्षणिक दत्तक उपक्रम दिलासा फाउंडेशन ने सुरू केला आहे. या उपक्रमासाठी दिलासा फाउंडेशन कडून सहाय्यक फौजदार कै. महेश मधुकर कळमकर यांचे स्मरणार्थ कुटुंबाकडून अनिल सप्रे या विद्यार्थ्याला शैक्षणिक मदत करण्यात आली आहे. तर खोपोली नगर परिषदेच्या माजी नगरसेविका प्रिया प्रवीण जाधव आणि ज्येष्ठ पत्रकार प्रवीण जाधव यांचे कुटुंबाकडून कै. श्रेयस प्रवीण जाधव याच्या स्मरणार्थ शिष्यवृत्ती देण्यात येत आहे.

ही शिष्यवृत्ती बबलू वारघडे या विद्यार्थ्याला देण्यात आली. छोटेखानी का होईना पण मदतीसाठी राबवलेल्या या उपक्रमाचे अतिशय मनापासून कौतुक करतो. अतिशय प्रतिकूल परिस्थितीत शिक्षण घेऊन पर्यंत पोहोचण्यासाठी ही मदत उपयोगी पडेल .विद्यार्थ्यांनी ह्या मदतीतून पुढे यशाची पायरी गाठावी त्यातच ही मदत सार्थकी लागेल असे तहसीलदार इरेश चप्पलवार यांनी तहसील कार्यालयात झालेल्या छोटेखानी कार्यक्रमात सांगितले.

खालापूर नगर पंचायत मुख्याधिकारी सुरेखा भणगे शिंदे, खालापूर प्रथम नगराध्यक्ष शिवानी जंगम, पोलीस निरीक्षक अनिल विभुते, खालापूर तालुका शिक्षण प्रसारक मंडळाचे अध्यक्ष संतोष जंगम, सेनेचे ज्येष्ठ नेते विजय पाटील, आश्रम शाळेचे मुख्याध्यापक सुरेश पाटील, जानकर सर खोपोली नगर परिषदेच्या माजी नगरसेविका प्रिया जाधव, दिलासा फाऊंडेशनचे सचिन कळमकर, उमेश विचारे आदिती कळमकर, भाग्यश्री शिंदे ,आकांशा देशमुख, अथर्व कळमकर यांच्या उपस्थितीत विद्यार्थ्यांना धनादेश देण्यात आला.