२०० कुटुंबांच्या मदतीला पार्थ पवार फाऊंडेशनची धाव

घारापुरी बेटावरील शेतबंदर, राजबंदर, मोराबंदर गावांत मोफत रेशन वाटप

सिटी बेल । उरण । विठ्ठल ममताबादे ।

समाजकार्यात अग्रणी असणाऱ्या पार्थ पवार फाऊंडेशन या संस्थेने मुंबईनजीक असणाऱ्या आणि अरबी समुद्रात स्थित उरण तालुक्यातील घारापुरी (एलिफंटा) या बेटावर वसलेल्या गावांना कुठलाही मोबदला न घेता जीवनावश्यक बाबी उपलब्ध करून दिल्या.

कोरोना महामारीने संपूर्ण जगाला हादरवून सोडले असताना सध्या भारतात या विषाणूने हाहाकार माजवला आहे. शहर-शहर, गाव-गाव कोरोनाच्या विळख्यात सापडल्याने मुख्यतः उदरनिर्वाहाचा मोठा प्रश्न गोरगरिबांना भेडसावत आहे. यातील गांभीर्यता लक्षात घेत संस्थेने बेटावरील तब्बल २०० कुटुंबांना मोफत राशन वाटप केले. यामुळे कुटुंबांच्या पोटापाण्याचा प्रश्न मार्गी लागल्याने गावकरी सुखावले आहेत.

उरण तालुक्यातील घारापुरी हे बेट सुप्रसिद्ध पर्यटन स्थळ आहे. पर्यटकांना बेटावरील प्राचीन लेण्यांची माहिती देणे, विविध आकर्षक वस्तूंची विक्री करणे, रुचकर पदार्थ देशी-विदेशी पर्यटकांना खाऊ घालणे इथल्या स्थानिकांचा प्रमुख व्यवसाय आहे. मात्र कोरोनाचा कहर तुटून पडला आणि या बेटावरील गावकऱ्यांचा व्यवसाय ठप्प झाला. परिणामी, आर्थिक उत्पन्नाचा मार्ग बंद झाला. त्यानंतर आर्थिक चणचण व दोन वेळच्या जेवणाची भ्रांत असलेल्या चिंताग्रस्त ग्रामस्थांना उदरनिर्वाहाचा भीषण प्रश्न सतावत होता. मात्र पार्थ पवार फाऊंडेशनने वेळेत धाव घेत घारापुरी बेटावर वसलेल्या शेतबंदर, राजबंदर आणि मोराबंदर या गावांत जाऊन त्याठिकाणी मोफत राशन वाटपाचा उपक्रम राबवला. गावांतील २०० कुटुंबांना अन्नधान्य व अन्य जीवनावश्यक वस्तूंचे वाटप करीत उदरनिर्वाहाची अडचण संस्थेने दूर केली.

पार्थ पवार फाऊंडेशनने मदतीचे महत्त्वपूर्ण पाऊल उचलत आम्हा गरजू गोरगरिबांच्या पोटाची खळगी भरून निघेल, अशी सोय करून दिली, याबद्दल श्री. पार्थदादा पवार आणि पार्थ पवार फाऊंडेशनचे जेवढे आभार मानावे तेवढे थोडेच, अशा भावूक शब्दांत ग्रामस्थ मंडळींनी आपल्या भावना व्यक्त केल्या. आपल्या विचारांतून आपले आचार दिसून येतात आणि सत्कार्यातून आपले अस्तित्व दिसून येते, अशी पार्थदादांची विचारधारणा आहे. याच विचारांना आचरणात आणून पार्थ पवार फाऊंडेशन ही संस्था समाजकार्यात सदैव अविरत कार्यरत आहे.

कोरोना संकट काळ सुरू झाला आणि इतर महत्त्वाच्या क्षेत्रांसोबतच पर्यटन क्षेत्रालाही याचा मोठा फटका बसला. गेले दीड वर्ष घारापुरी बेटावरील पर्यटन व्यवसाय हा पूर्णपणे बंद अवस्थेत असल्याने आमच्यावर अक्षरशः उपासमारीची वेळ येऊन ठेपली. परंतु पार्थ पवार फाऊंडेशनने आम्हा गावकऱ्यांच्या समस्यांची दखल घेत मोफत राशन वाटप केले. यासाठी आम्ही पार्थदादा पवार व पार्थ पवार फाऊंडेशन या संस्थेचे कायम ऋणी राहू.

रमेश पाटील, ग्रामस्थ.

पार्थ पवार फाऊंडेशनच्या माध्यमातून यापूर्वी सुद्धा आम्हाला मदत मिळाली होती. आताच्या घडीला आमची आर्थिक परिस्थिती बेताची असताना पुन्हा एकदा पार्थदादा पवार आमच्या मदतीला धावून आले. आम्हाला मोफत राशन वाटप केले. याबद्दल आम्ही पार्थदादांचे आणि पार्थ पवार फाऊंडेशनचे खूप खूप आभारी आहोत.

लक्ष्मण पाटील, ग्रामस्थ.