अलिबाग प्रेस असोसिएशन तर्फे तेजस्वीनी पुरस्कार वितरण

महिला सबळीकरणासाठी प्रत्येक महिलेने पुढाकार घ्यावा – जिल्हाधिकारी निधी चौधरी

सिटी बेल लाइव्ह । अलिबाग । धनंजय कवठेकर ।

स्त्री कधीही अबला नव्हती, निसर्गाने कोणत्याही परिस्थितीचा सामना करण्याची शक्ती तिला दिलेली आहे. फक्त, पुरुषप्रधान संस्कृतीमध्ये परंपरा, रितीरिवाज, अंधश्रद्धांमध्ये महिलेला बंदिस्त रहावे लागलेले आहे. महिलांचे हक्क, त्यांचे अधिकार मिळवून त्यांना मान, सन्मान मिळवून देण्यासाठी प्रत्येक महिलेने पुढाकार घेणे आवश्यक असल्याचे आवाहन रायगडच्या जिल्हाधिकारी निधी चौधरी यांनी अलिबाग येथे केले. अलिबाग प्रेस असोसिएशनने आयोजित केलेल्या तेजस्वीनी पुरस्कार वितरत समारंभात त्या बोलत होत्या. 

रायगड जिल्हा मध्यवर्ती सहकारी बॅंकेच्या सभागृहात झालेल्या या पुरस्कार वितरण समारंभासाठी निवासी उपजिल्हाधिकारी पद्मश्री बैनाडे, अलिबाग- मुरुडच्या प्रांताधिकारी शारदो पोवार,  रायगड जिल्हा मध्यवर्ती बॅकेचे मुख्याधिकारी प्रदिप नाईक, अलिबाग प्रेस असोसिएशनचे अध्यक्ष रमेश कांबळे उपस्थित होते.

यावेळी जिल्हाधिकारी निधी चौधरी यांनी कुटुंबातील मुली- मुलांना समान अधिकार, समान वागणुक मिळण्याची आवश्यकता व्यक्त केली. परंपरेच्या जोखडाखालून मुक्त होण्यासाठी महिलांनी सामुहीक प्रयत्न करताना यास कुटुंबातील पुरुषांनीही महिलांच्या प्रयत्नांना सकारात्मक दृष्टीने पाहिले पाहिजेत. कोणत्याही क्षेत्रात महिला मागे राहिलेल्या नाहीत. मात्र, याचे प्रमाण खूपच अल्प प्रमाणात आहे. कलं भी भारी थी, आज भी भारी है।  असे म्हणत  प्रत्येक महिलेने प्रयत्न करण्याची गरज निधी चौधरी यांनी व्यक्त केली.   

चुल आणि मुलं  यांच्या पलिकडे जाऊन आपल्या कार्याचा ठसा उमटवणाऱ्यां महिलांचा सत्कार महिला दिनाचे औचित्य साधू दरवर्षी अलिबाग प्रेस असोसिशएनच्या माध्यातून केला. मागील 12 वर्षापासून अलिबाग प्रेस असोसिएशने ही प्रथा संभाळली. जिल्हा मध्यवर्ती बॅंकेच्या सभागृहात रविवार, (ता. 8) आयोजित करण्यात आलेल्या महिला दिनाच्या कार्यक्रमात या पुरस्काराचे वितरण करण्यात आले. यामध्ये कोरोना कालावधीत आरोग्य सेवा देणाऱ्या डॉ. अपुर्वा पाटील,  ग्रामीण रुग्णालय मुरुड तालुक्यातील आरोग्य सेविका दक्षता चौगुले ( मुरुड ), कोरोना कालावधीत ग्रामस्यांचा विरोध पत्करून गावोगावी प्रवाशांची वाहतुक करणाऱ्या एसटी वाहक करूणा ठाकूर ( रोहा) चक्रीवादळात म्हसळा तालुक्यात गर्भवती महिलेला रुणालयात वेळेत पोहचवणार्‍या आरती राऊत ( पोलीस कर्मचारी ), लॉक डाऊनमध्ये सलग71 दिवस पोलीस कर्मचारी, आरोग्य सेवक, पत्रकार यांना नास्त्याची व्यवस्था करणारे पुजा नायक, वयाच्या तिसऱ्या वर्षात गिर्यारोहणाचा विक्रम करणान्या शर्मिका म्हात्रे यांचा सत्कार शाळ, श्रीफळ, सम्मान पत्र आणि तुळशीचे रोप देऊन सन्मानीत करण्यात आले.