जमिनीच्या वादातून झालेल्या हाणामारीतील आणखी एका आरोपीला अटक

सिटी बेल लाइव्ह । कर्जत । संजय गायकवाड । 🔷🔷🔶🔶

कर्जत तालुक्यातील गौळवाडी येथील जमिनीच्या वादातून झालेल्या हाणामारीत एका शेतकऱ्याला गंभीर दुखापत करून फरार झालेल्या लोणावळा येथील एका आरोपीला यापूर्वी पोलिसांनी अटक केली आहे. तर कर्जत मधील मुद्रे विभागात राहणाऱ्या आणखी एका आरोपीला पोलिसांनी अटक करून न्यायालयात हजर केले. न्यायालयाने त्याला 30 नोव्हेंबर पर्यंत पोलीस कोठडीत ठेवण्याचा आदेश दिला आहे.

याबाबत कर्जत पोलिसांनी सांगितलेली हकीकत अशी की, मुंबई येथील ठक्कर नावाच्या व्यक्तीने गौळवाडी येथे जमिन मिळकती विकत घेतल्या आहेत. त्यांनी जमिनी रीतसर खरेदी खत करून विकत घेतल्या असल्या तरी काही जमिनींवरील सात बारा उताऱ्यावर ललित कांतीलाल सालेशा यांच्या वडिलांचे नाव आहे. त्या जागेवर ठक्कर यांनी घातलेले कंपाऊंड सालेशा यांनी तोडले तेथे झोपडी बांधली होती. झोपडी तोडण्यासाठी व ते तोडलेले कंपाऊंड जोडण्यासाठी ठक्कर यांच्या सांगण्यावरून दि. 3 नोव्हेंबर 2020 रोजी दुपारच्या सुमारास दोन चारचाकी गाडीतून हातात लोखंडी रॉड व काठ्या घेऊन 25 ते 35 वयोगटातील 10 ते 12 इसम आले त्यांनी सालेशा यांना बेदम मारहाण केली.

या मारहाणीत त्यांचा उजवा पाय फॅक्चर झाला तर डाव्या पायाला दुखापत झाली. तसेच त्यांना लाथा बुक्क्यांनी बेदम मारहाण करून झोपडी तोडून हे सर्वजण फरार झाले.
याबाबत सालेशा यांनी कर्जत पोलीस ठाण्यात गुन्हा नोंद केला. हे सर्वजण अनोळखी असल्याने पोलिसांना आरोपी शोधून काढण्याचे मोठे आव्हान होते. कर्जतचे उपविभागीय पोलीस अधिकारी अनिल घेरडीकर यांच्या मार्गदर्शनाखाली पोलीस निरीक्षक अरुण भोर आणि अन्य पोलीस शिपायांना आरोपींचा सुगावा लावण्यात यश आले. त्यांनी काही दिवसांपूर्वी या टोळीतील दिलीप कमलाकांत दुबे ( वय – 45 ) याला लोणावळ्यातून अटक केली तर या गुन्ह्यात सहभागी असलेल्या व बऱ्याच दिवसांपासून फरार असलेल्या मुद्रे विभागात राहणाऱ्या अनिरुद्ध यशवंत पवार ( वय – 28 ) याला पोलिसांनी अटक केली व कर्जत न्यायालयात हजर केले.

न्यायाधीशांनी पवार याला 30 नोव्हेंबर 2020 पर्यंत पोलीस कोठडी दिली आहे. या गुन्ह्यातील अन्य आरोपींचा तपास सुरू असून लवकरच त्यांनाही अटक करण्यात येईल असा विश्वास पोलीस निरीक्षक अरुण भोर यांनी बोलून दाखविला.