कर्तव्य बजावणाऱ्या वाहतूक पोलिसाचा दोन वाहनांच्या धडकेत दुर्दैवी अंत

मुंबई पुणे एक्सप्रेस वेवरील घटना 🔷🔶🔷

सिटी बेल लाइव्ह । रायगड । धम्मशील सावंत । 🔶🔷🔶

मुंबई पुणे एक्सप्रेस वेवर कर्तव्य बजावणाऱ्या वाहतूक पोलिस कर्मचाऱ्याचा अपघातात दुर्दैवी अंत झाला. या घटनेने सर्वत्र हळहळ व्यक्त होत आहे. दि. 13 ऑक्टोबर 2020 रोजी साधारणपणे 2.45 वाजताच्या सुमारास मुंबई पुणे एक्सप्रेस वे वर वाहतूक पोलीस कॉन्स्टेबल सचिन सोनवलकर गस्त घालत होते. त्याच दरम्यान किलोमीटर 12.400 पुणे लेनला MH 04 GF 4563 या ट्रकला मागून येणाऱ्या कंटेनर क्रमांक NL 01 L 6497 ने धडक दिली.

त्या ठिकाणी अचानक उदभवलेल्या अपघातात आपला जीव वाचविण्यासाठी प्रयत्न करणाऱ्या ट्राफिक पोलीस कर्मचारी सचिन सोनवलकर यांना अपयश आले आणि त्यांचा जागीच मृत्यू झाला.

या विदारक घटनेने महामार्ग पोलीस यंत्रणेला दुःखाच्या खाईत लोटले असून या वृत्ताची खबर मिळताच महामार्ग वाहतूक विभागाचे ठाणे डिव्हिजनचे पोलीस अधीक्षक दिगंबर प्रधान आणि सर्व अधिकारी घटनास्थळी दाखल झाले आहेत.

या अपघाताचा पुढील तपास सुरू आहे.