उरणमधील गुटखा विक्रेत्यांना अभय कुणाचे ?

सिटी बेल लाइव्ह / उरण(घन:श्याम कडू)

राज्यावर कोरोना महामारीचे संकट असतानाही उरण तालुक्यात अवैध गुटखा विक्रीला ऊत आला आहे. एवढंच नाही तर काही गुटखा विक्रेते होलसेलर बनले असून तालुक्यातील खेड्या-पाड्यात गुटखा पुरवण्याचा काम सुरू केलं आहे.महाराष्ट्र सरकारने गुटखा विक्री वर बंदी आणली मात्र ही बंदी कागदावरच असल्याचं दिसून आलं आणि असाच गुटखा व्यवसाय उरण तालुक्यात जोरात सुरू आहे .

पोलीस आणि अन्न प्रशासन विभागाच्या आशीर्वादाने या परिसरात सर्रासपणे गुटखा विक्री सुरु असल्याची दबक्या आवाजात चर्चा सुरु आहे. दररोज लाखो रुपयांच्या गुटख्याची विक्री उरण परिसरात होत असल्याची धक्कादायक माहिती सूत्राकडून समजते. कोरोना काळात बंदी असतानाही तालुक्यात होलसेल गुटखा विकला जात आहे. विशेष म्हणजे भरदिवसा दुचाकी वर बॉक्स टाकून बिनधास्त लागेल त्याला माल पुरवला जातो.

संबधीत खात्याच्या भ्रष्ट अधिकाऱ्यांशी विक्रेत्यांचे आर्थिक हितसंबंध असल्याने कारवाई होण्याची चिंता नाही त्यामुळे गुटखा विक्रेता दिवस-रात्र गुटखा विक्री करत आहे. उरणमध्ये कासमभट, वाणीआली, आंदनगर, वीर सावरकर मैदानासमोर, डाऊर नगर, मुळेखंड फाटा अशा अनेक ठिकाणी गुटखा विक्री मोठ्या प्रमाणात होत आहे. छोट्या टपरीपासून ते मोठ्या दुकानांमधूनही परराज्यातून येणाऱ्या अनेक ब्रॅँडच्या गुटख्याची खुलेआम विक्री होत असून, अन्न व औषध प्रशासनाने याबाबत डोळेझाक करण्याची भूमिका घेत आहे.

राज्यातील ठाकरे सरकारने गुटखाबंदीची कडक अंमलबजावणी व्हावी म्हणून गुटखा विक्री वा साठेबाजीत सहभागी असणाऱ्या आरोपींवर अजामीनपात्र गुन्हा दाखल करण्याचा निर्णय घेतला. याबाबतचा कायदा इतका कडक होऊनही त्यांची अंमलबजावणी मात्र संबंधित यंत्रणांकडून होताना दिसून येत नाही. त्यामुळे या सर्वच प्रकारात मिलीभगत असल्याचे खुलेआम आरोप जनतेतून होत आहे. या कायद्याची अंमलबजावणी करणाऱ्या यंत्रणेकडूनच ढिलाई दाखवली जात असल्याने कायदा कडक असूनही उरण तालुक्यात खुलेआम गुटखा विक्री केली जात आहे.

उरणमध्ये कासमभट, वाणीआली, आंदनगर, वीर सावरकर मैदानासमोर, डाऊर नगर, मुळेखंड फाटा आदी ठिकाणी गुटख्याची दररोज लाखो रुपयांची होलसेल विक्री