पनवेल एज्युकेशन सोसायटी निवडणुकीत इक्बाल हुसेन काझी यांनी सर्वाधिक ५६० मते मिळवत पटकावला प्रथम क्रमांक ; १२ जागांसाठी १४ उमेदवारांमध्ये लढत; ८७१ पैकी ६७० सदस्यांनी बजावला मतदानाचा हक्क

पनवेल, दि.१५ (वार्ताहर) : मुसळधार पावसाने पनवेल शहराला झोडपून काढले असतानाही पनवेल एज्युकेशन सोसायटीच्या निवडणुकीतील मतदानावर त्याचा फारसा परिणाम झाला नाही. प्रतिकूल हवामानाची पर्वा न करता संस्थेच्या सदस्यांनी मतदान केंद्रावर उपस्थित राहून आपल्या पसंतीच्या उमेदवारांना मतदान केले. याकूब बेग हायस्कूल येथे झालेल्या मतदान प्रक्रियेत एकूण ८७१ मतदारांपैकी तब्बल ६७० सदस्यांनी मतदानाचा हक्क बजावला, तर २०१ सदस्य मतदानापासून दूर राहिले.

पनवेल एज्युकेशन सोसायटीच्या निवडणुकीत १२ जागांसाठी १४ उमेदवार रिंगणात होते. त्यामुळे निवडणुकीत चुरस निर्माण झाली होती. मुसळधार पावसाचा जोर असतानाही सदस्यांनी मोठ्या संख्येने मतदान केंद्रावर उपस्थित राहून मतदान केले.

मतदान प्रक्रिया पूर्ण झाल्यानंतर झालेल्या मतमोजणीत इक्बाल हुसेन काझी यांनी सर्वाधिक ५६० मते मिळवत प्रथम क्रमांक पटकावला. त्यानंतर मोहम्मद नूर पटेल यांना ५३७, निसारभाई पटेल यांना ५३३, साजिद नासिर पटेल यांना ५३०, नावीद पटेल यांना ५१८, अझीम शब्बीर मुल्ला यांना ५०९, आफताब पिट्टू यांना ४७६, आसिफ कारेल यांना ४७३, जुबेर पिट्टू यांना ४५८, अब्दुल मुकीत काझी यांना ४३३, जव्वाद काझी यांना ४१९ आणि अलीम पटेल यांना ३६४ मते मिळाली. या १२ उमेदवारांनी विजय मिळवत संस्थेच्या संचालक मंडळात स्थान मिळविले.

दरम्यान, निवडणुकीत रफीक धातुरे यांना ३०१ मते, तर मन्नान मास्तर यांना १६० मते मिळाली. त्यामुळे १२ जागांसाठी झालेल्या निवडणुकीत वरील १२ उमेदवार विजयी ठरले.

मतदानाची टक्केवारी लक्षणीय
एकूण ८७१ मतदारांपैकी ६७० सदस्यांनी मतदान केल्याने मतदानाची टक्केवारी सुमारे ७७ टक्के राहिली. विशेष म्हणजे मुसळधार पावसाची परिस्थिती असतानाही सदस्यांनी मतदानाचा हक्क बजावल्याने निवडणुकीला उत्स्फूर्त प्रतिसाद मिळाल्याचे दिसून आले.
मतदान प्रक्रियेदरम्यान मतदान केंद्रावर सदस्यांची मोठी वर्दळ होती. निवडणूक प्रक्रिया सुरळीत पार पाडण्यासाठी आवश्यक ती व्यवस्था करण्यात आली होती. मतदानानंतर मतमोजणी करून निकाल जाहीर करण्यात आला.

नवनिर्वाचित प्रतिनिधींसमोर मोठी जबाबदारी
निवडणुकीत विजयी झालेल्या १२ सदस्यांवर आता पनवेल एज्युकेशन सोसायटीच्या पुढील वाटचालीची महत्त्वपूर्ण जबाबदारी असणार आहे. संस्थेचा शैक्षणिक विकास, विद्यार्थ्यांचे हित, शैक्षणिक सुविधांमध्ये वाढ तसेच संस्थेचा कारभार अधिक प्रभावी आणि पारदर्शक करण्याचे आव्हान नवनिर्वाचित प्रतिनिधींसमोर राहणार आहे.
मतदारांनी आपल्या मतदानातून नवनिर्वाचित प्रतिनिधींवर विश्वास व्यक्त केला असून, हा विश्वास योग्य पद्धतीने सार्थ ठरविण्याची अपेक्षा संस्थेच्या सदस्यांकडून व्यक्त होत आहे.

मुसळधार पावसातही मतदानासाठी मोठ्या संख्येने सदस्य उपस्थित राहिल्याने पनवेल एज्युकेशन सोसायटीच्या निवडणुकीला उत्स्फूर्त प्रतिसाद मिळाला. निवडणुकीचा निकाल जाहीर होताच विजयी उमेदवारांचे समर्थक आणि सदस्यांनी त्यांचे अभिनंदन केले.