पिगोंडे ग्रामपंचायतीच्या वतीने कोरोना योध्यांचा सन्मान

सिटी बेल लाइव्ह / नागोठणे (महेश पवार) :

कोरोना महामारीच्या कालावधीत गेले तीन महिने जीवाची पर्वा न करता पिगोंड ग्रामपंचायत हद्दीत काम करणारे विविध क्षेत्रातील व्यक्तीची दखल सरपंच संतोषभाई कोळी यांनी घेऊन आपले लाडके नेते रायगडचे खासदार सुनिल तटकरे यांच्या वाढदिवसाचे औचित्य साधून पिगोंडे ग्रामपंचायतीच्या वतीने या व्यक्तींचा कोरोना योद्धा म्हणून गौरवपत्रक देऊन गौरव करण्यात आला. तसेच त्यांना कोरोना विषाणूशी लढण्यासाठी आवश्यक साहित्याचे वाटप करण्यात आले.

नागोठणे विभागातील पिगोंडे ग्रामपंचायतीच्यावतीने हद्दीतील गावांमध्ये कोरोनाच्या पार्श्वभूमीवर काम करणार्‍या आशा सेविका, अंगणवाडी सेविका, आरोग्यसेविका, महावितरण तसेच ग्रामपंचायत कर्मचारी आणि नागोठणे प्राथमिक आरोग्य केंद्राचे वैद्यकीय अधिकारी डॉ. चेतन म्हात्रे यांचा गौरव समारंभ ग्रामपंचायतीचच्या सभागृहात पार पडला. यावेळी या सर्व कोरोना योद्ध्यांना सॅनिटायझर, मास्क, फेस शिल्ड, हँड ग्लोव्हज या साहित्याचे वाटप करण्यात आले.

यावेळी प्रा. आ. केंद्राचे आरोग्य सहाय्यक यशवंत कर्जेकर यांनी विभागातील ग्रामपंचायतींमध्ये असा उपक्रम राबविणारी पिगोंडे ग्रामपंचायत ही पहिलीच ठरली आहे. ज्यांच्याकडून नागोठणे प्राथमिक आरोग्य केंद्राला अत्यावश्यक असणार्‍या वस्तू उपलब्ध झाल्या. याबद्दल त्यांनी ग्रामपंचायतीचे विशेष आभार मानले. तर डॉ. चेतन म्हात्रे यांनी या ग्रामपंचायत हद्दीतील गावांमध्ये कोरोनाचा शिरकाव झाला असल्याने सर्व नागरिकांनी कायम मास्कचा वापर करावा, असे आवाहन केले. यावेळी ग्रा. पं. सदस्या कांचन माळी, ग्रामपंचायतीचे जेष्ठ मार्गदर्शक सुधाकर पारंगे यांनीही आपले मनोगत व्यक्त केले.

या कार्यक्रमाला उपसरपंच सखाराम घासे, ग्रामपंचायत सदस्य नाना बडे, नेत्रा रोशन पारंगे, गीता पाटील, शैलेश शेलार, रंजना माळी, कुसुम बावकर, धनाजी पारंगे, ग्रामसेवक विजय अहिरे यांंच्यासह गोरखनाथ पारंगे, विजय मांडुलस्कर, यादव माळी आदी उपस्थित होते.