महत्वपूर्ण विषयावर टी आय ए चे वेबिनार : अध्यक्ष सतीश अण्णा शेट्टी यांचा पुढाकार ###
सिटी बेल लाईव्ह/ exclusive ###
कोरोना विषाणू च्या प्रादुर्भावामुळे आपण सगळेच 22 मार्च पासून लॉक डाऊन झालो होतो. जुलै महिन्याच्या एक तारखेपासून आपण हळूहळू अन् लॉक डाऊन ही प्रक्रिया सुरू केली आहे. लॉक डाऊन मुळे भारत देशासह संपूर्ण जगाचे अर्थचक्र खोळंबले आहे. अर्थचक्र खोळंबले असताना औद्योगिक जगत लवकरात लवकर सुरू होणे ही अर्थ चक्राला वेग देण्यासाठी गुरुकिल्ली ठरणार आहे. औद्योगिक जगत सुरू करत असताना कामगारांची सुरक्षा, सामाजिक अंतर राखण्याचे नियम, उत्पादन क्षमतेवर त्याचा होणारा परिणाम, उद्योजकांचा नफा-तोटा ताळेबंद समन्वय, कामगारांच्या ने आण करण्याची तजवीज अशा अनेक मुद्द्यांच्या बाबत संभ्रमावस्था आढळते.
ही संभ्रमावस्था दूर करण्यासाठी सुरक्षितरित्या उद्योग जगत कसे सुरु करावे? या विषयावर तळोजा इंडस्ट्रीज असोसिएशनच्या माध्यमातून एका वेबिनार चे आयोजन करण्यात आले आहे.टी आय ए चे अध्यक्ष सतीश अण्णा शेट्टी यांनी आमच्या प्रतिनिधीला ही माहिती दिली.
औद्योगिक सुरक्षा आणि आरोग्य संचालनालय चे सहसंचालक एम आर पाटील आणि औद्योगिक सुरक्षा प्रदान करण्यात अग्रणी असणाऱ्या युनिको चे संचालक अनुपम शुक्ला यांचे या वेबिनार मध्ये मार्गदर्शन लाभणार आहे.
सतीश आण्णा शेट्टी यांनी याबाबत माहिती देताना सांगितले की तळोजा इंडस्ट्रीज असोसिएशनच्या अनेक सदस्यांना या वेबिनार चा फायदा होईल. गुरुवार दिनांक नऊ जुलै रोजी सायंकाळी पाच वाजता हे वेबिनार आयोजित करणार असल्याचे त्यांनी सांगितले. उद्योग जगत सुरू होणे ही काळाची गरज बनली आहे. असे असले तरीसुद्धा येथील कर्मचारी आणि उद्योजक यांच्या जिवाला कुठलाही धोका पोहोचू नये या भावनेतून आम्ही या वेबिनार चे आयोजन करत आहोत. दिग्गज मान्यवरांच्या सहभागामुळे सुरक्षित रित्या उद्योगजगत पुन्हा सुरू करण्यासाठी आमच्या सदस्यांना निश्चितच मोलाचे मार्गदर्शन मिळेल.
Be First to Comment