अध्यक्षपदी ध्वनी तन्ना

“रोटरी क्लब ऑफ पनवेल सिटी” ची स्थापना

सिटी बेल ∆ पनवेल ∆

रोटरी कम्युनिटी हॉल, खांदा कॉलनी येथे “रोटरी क्लब ऑफ पनवेल सिटी” या नवीन रोटरी क्लबचा सनद सादरीकरण, स्थापना समारंभ आणि सर्व नवीन सभासदांचा शपथ ग्रहण विधी साजरा झाला. रोटेरियन ध्वनी हर्मेश तन्ना यांची सनदी अध्यक्षपदी आणि रोटेरियन कमांडर दीपक जांबेकर यांची सनदी सचिव म्हणून नियुक्ती करण्यात आली.

या समारंभास प्रमुख पाहुणे म्हणून रोटरी डिस्ट्रिक्ट 3131 चे डिस्ट्रिक्ट गव्हर्नर डॉ अनिल परमार, तसेच आमदार प्रशांत ठाकूर उपस्थित होते.
या कार्यक्रमासाठी आर. वाय. डी. 3131 च्या फर्स्ट लेडी रोटेरियन डॉ. हेमा परमार, डिस्ट्रिक्ट मेंबरशिप डिटेक्टर रोटेरियन पंकज पटेल आणि न्यू क्लबचे सल्लागार आणि सहायक गव्हर्नर रोटेरियन मनोज मुनोत हे देखील उपस्थित होते.

राकेश झुनझुनवाला शंकरा आय हॉस्पिटल, नवीन पनवेल या हॉस्पिटल चे युनिट हेड रोटेरियन डॉ राजेश कापसे यांनी बासरी वादन करून या कार्यक्रमाची सुरेल सुरुवात केली. यावेळी त्यांनी राग यमन सादर केला.
प्रायोजक रोटरी क्लब ऑफ पनवेल एलाईट च्या अध्यक्षा रोटेरियन डॉ. स्वाती लिखिते आणि सचिव रोटेरियन आदित्य जोशी यांनी सभेची औपचारिक सुरुवात केली.

रोटेरियन हरमेश तन्ना आणि रोटेरियन डॉ. राजेश कापसे यांनी सर्व मान्यवरांचे स्वागत केले. प्रमुख पाहुणे डीजी डॉ.अनिल परमार यांनी नूतन अध्यक्ष ध्वनी यांना सनद, गोंग आणि गेवेल आणि कॉलर प्रदान केले. डॉ. स्वाती लिखिते यांनी तिला पिन प्रदान केली. कमांडर जांबेकर यांना डीजीनी कॉलर आणि रो. आदित्य जोशी यांनी पिन प्रदान केली. सनदी कोषाध्यक्ष रो. भावेश रंगपरिया यांना डीजीनी कॉलर आणि आमदार श्री प्रशांतजी ठाकूर यांनी पिन प्रदान केली.

अध्यक्ष ध्वनी यांनी त्यांच्या संचालक मंडळाची घोषणा अतिशय अभिनव पद्धतीने केली. यावेळी त्यांनी सर्वांची ओळख करून देताना प्रत्येकाच्या नावा आगोदर त्यांच्या व्यक्तिमत्त्वातील एक सकारात्मक गुणाची उपाधी वापरत नवीन क्लब ची विशेषता अधोरेखित केली.

उपस्थित सर्व मान्यवरांच्या हस्ते सर्व नवीन क्लब सदस्यांनाही रोटरी पिन प्रदान करण्यात आली, तसेच डीजी डॉ.अनिल परमार यांनी सर्व क्लब सदस्यांचा शपथ विधी घेतला.
रोटरी क्लब ऑफ पनवेल सिटीने एका सुंदर आणि अत्यंत सर्जनशील व्हिडिओद्वारे आपला क्लब लोगो प्रदर्शित केला. हा क्लब लोगो कर्तुत्व, दातृत्व, दायित्व, करुणा, कृती, मैत्री या 6 मुख्य मूल्यांवर आधारित आहे.
रो. नितेश गौर यांनी विकसित केलेल्या क्लब वेबसाईट चे विमोचन देखील यावेळी करण्यात आले. याचबरोबर गार्गी ग्राफिक्स च्या मिहिर व इतर कर्मचारी यांनी तयार केलेल्या क्लबच्या ध्वजाचे प्रकाशन करण्यात आले.
बुलेटिन एडिटर रो. बिपिन शाह, सहाय्यक बुलेटिन एडिटर रो. डॉ. फोरम ठक्कर यांनी तयार केलेल्या चार्टर क्लब बुलेटिन “मैत्री” चे देखील उपस्थित मान्यवरांच्या हस्ते प्रकाशन करण्यात आले.

अध्यक्ष ध्वनी यांनी आपल्या भाषणात घोषित केले की क्लबच्या सर्व सदस्यांच्या एकत्रित प्रयत्नांनी त्यांचा क्लब समाजात सर्वत्र स्मितहास्य आणण्यासाठी आणि क्लबच्या मूलभूत मूल्यांवर कार्य करण्यासाठी सतत प्रयत्नशील राहील.

रो. डॉ. स्वाती यांनी सनदी अध्यक्ष ध्वनी यांचा परिचय करून दिला आणि त्यांना शुभेच्छा दिल्या. रो. आदित्य जोशी यांनी सनदी सचिव सीडीआर जांबेकर यांचा परिचय करून दिला. एजी मनोज मुनोत आणि जिल्हा सदस्यत्व संचालक रो. पंकज पटेल यांनी नवीन क्लब स्थापनेबद्दल सांगितले.

आमदार प्रशांत ठाकूर यांनी आपल्या भाषणात रोटरी च्या कामाचा गौरव करीत नवीन क्लबच्या भावी वाटचालीस शुभेच्छा दिल्या
डिस्ट्रिक्ट गव्हर्नर डॉ. परमार यांनी रोटरी इंटरनॅशनलबद्दल बोलतांना सांगितले की, इतिहासात प्रथमच आरआयच्या अध्यक्षा एक महिला आहेत आणि नवीन क्लबच्या सनदी अध्यक्ष ध्वनी या देखील एक महिला आहेत हा खूप छान संयोग आहे. तसेच रोटरी क्लब ऑफ पनवेल सिटी हा रोटरी डिस्ट्रिक्ट 3131 चा सदस्य क्लब असणे ही डिस्ट्रिक्ट 3131 साठी अभिमानाची गोष्ट आहे कारण रोटरी वर्ष 2022-23 मध्ये संपूर्ण भारतातील सनद मिळालेला हा पहिला क्लब आहे.
डॉ. परमार यांनी नवीन क्लब, क्लब चे सर्व सदस्य आणि सनदी अध्यक्ष आणि चार्टर सेक्रेटरी यांचे अभिनंदन केले आणि त्यांच्या भाषणात त्यांना उज्ज्वल भविष्यासाठी शुभेच्छा दिल्या.

रो. डॉ. रोहित जाधव यांनी कार्यक्रमाचे सूत्रसंचालन केले. आभारप्रदर्शन कमांडर दीपक जांबेकर यांनी केले.