गावदेवी मंदिराची प्राणप्रतिष्ठा व जिर्णोद्धार सोहळा

वडगाव गावदेवी मंदिराच्या सुशोभिकरणासाठी मदत देईन : मा.आमदार मनोहर शेठ भोईर

सिटी बेल • रसायनी • राकेश खराडे •

वडगाव ग्रामपंचायत हद्दीतील वडगाव गावाच्या वेशीवर आई गावदेवी भवानी माता प्राणप्रतिष्ठा व मंदिर जिर्णोद्धार सोहळा रविवार दि.13 रोजी मोठ्या उत्साहात साजरा करण्यात आला.

या कार्यक्रमाला मा.आमदार तथा शिवसेना जिल्हाप्रमुख मनोहरशेठ भोईर,जि.प.सदस्य मोतीराम ठोंबरे, तालुकाप्रमुख रघुनाथ पाटील,वासांबे मोहोपाडा जि.प.विभागप्रमुख अजित सावंत, सुधीर पाटील आदी मान्यवर उपस्थित होते.मान्यवरांचे शाल, सन्मानचिन्ह व पुष्पगुच्छ देवून आभार मानण्यात आले.

गेली पाच वर्षे वडगाव ग्रामस्थांच्या निधीतून आई गावदेवीच्या मंदिराचे काम सुरू होते.अखेर ग्रामस्थ वर्गंणी व दानशूरांनी मदत करुन मंदिराचे काम पुर्ण झाले.या मंदिरासाठी माजी आमदार मनोहर भोईर यांचेही मोलाचे योगदान आहे.याकरिता प्राणप्रतिष्ठा व जिर्णोद्धार सोहळ्यात ग्रामस्थांच्या आग्रहाखातर माजी आमदार मनोहर भोईर उपस्थित राहून वडगाव गावदेवी मंदिराच्या सुशोभिकरणासाठी मदत देणार असल्याचे सांगितले.

याप्रसंगी शनिवार दि.12 रोजी विविध कार्यक्रम पार पडले तर रविवार दि.13 फेब्रुवारी रोजी पहाटे काकडा आरती, सकाळी 8 वाजता मंदिर वास्तुशांती, सकाळी 9 वाजता ध्वजपुजन, कलशपुजन, घंटा पुजन,समई पुजन, दुपारी 12:30 वाजता होमहवन व प्राणप्रतिष्ठा सोहळा, दुपारी 3 वाजता महिला हळदी कुंकू समारंभ, सायंकाळी 6 ते 7 हरिपाठ, सायंकाळी 7 ते 8 महाप्रसाद व रात्री भजन व किर्तनाचा कार्यक्रम पार पडला.

यावेळी माजी आमदार मनोहर भोईर यांनी बोलताना सांगितले की गावाच्या वेशीवर हे आई गावदेवीचे मंदिर असल्याने भक्तांना आकर्षण ठरणार आहे.वडगाव ग्रामस्थांच्या सहकार्यातून मंदिर उभे राहिले असून मंदिराच्या सुशोभिकरणासाठी सहकार्य करणार असल्याचे माजी आमदार मनोहर भोईर यांनी बोलताना सांगितले.कार्यक्रम यशस्वी करण्यासाठी वडगाव ग्रामस्थांनी अथक परिश्रम घेतले.