रत्नेश्वरी देवीच्या मंदिराच्या संरक्षणासाठी हजारो ग्रामस्थांचा उत्स्फूर्त प्रतिसाद

सिटी बेल | उरण | विठ्ठल ममताबादे |

उरण तालुक्यातील जसखार गावाचे जागृत देवस्थान असलेल्या रत्नेश्वरी देवीच्या मंदिराच्या संरक्षणासाठी काल संध्याकाळी 7.30 वाजता प्राथमिक बैठक रत्नेश्वरी मंदिर जसखार -उरण तालुका येथे घेण्यात आली.बैठकीसाठी जसखार गावातील आणि आजू बाजूच्या गावातील हजारो नागरिकांनी उपस्थित राहून सहभाग दाखवला.

मंदिराच्या अगदी जवळून जाणाऱ्या ब्रीज मुळे मंदिराचे सौंदर्य धुळीला मिळाले असून त्या ब्रीज साठी खोदण्यात आलेल्या पायलिंग मुळे मनिराच्या मुख्य पिलर आणि बिमना तडे गेलेले असून भिंतीचे देखील खुप नुकसान झालेले आहे. ग्रामपंचायत जसखार, जेएनपीटी, सिडको, NHAI यांना अनेक वेळा पत्र व्यवहार करूनही कोणत्याही प्रकारचे उत्तर मिळाले नसून अनागोंदी कारभार सुरू आहे.

उरण सामाजिक संस्थेचे अध्यक्ष सुधाकर पाटील आणि सामाजिक कार्यकर्ते तथा उरण सामाजिक संस्थेचे सरचिटणीस संतोष पवार यांना जसखार मधील तरुणांनी मार्गदर्शनासाठी बोलावले होते. दोघांनीही मंदिराची पाहणी करून झालेल्या दुरावस्थेवर चिंता व्यक्त केली. जर ह्या ब्रीज चे काम त्वरित थांबविले नाही आणि त्याचा मार्ग मंदिराच्या दुरून नेला नाही तर भविष्यात तीव्र आंदोलन छेडण्याचा इशारा देण्यात आला.

अमित ठाकूर यांनी महत्त्वाचा मुद्दा उपस्थित केला की रत्नेश्वरी देवीने जसखार गावाचे संरक्षण वर्षानुवर्ष केलेले आहे. आता त्याच्या मंदिराच्या संरक्षणाची जबाबदारी आपल्यावर आली आहे. म्हणून सर्वांनी जागृत राहून उरण सामाजिक संस्थेच्या मार्गदर्शनाखाली जी काही आंदोलनाची दिशा ठरवली जाईल त्यात मोठ्यात मोठ्या संख्येने हजर राहावे असे आवाहन करण्यात आले. प्रा राजेंद्र मढवी यांनी सर्वांचे आभार मानले.