भेंडखळ ग्रामपंचायतीचा पंचक्रोशीत डंका, गावात केले १००% व्हॅक्सिनेशन

सिटी बेल | उरण | अजित पाटील |

संपूर्ण जगात थैमान घातलेल्या कोरोना महामारीच्या पार्श्वभूमीवर संपूर्ण भेंडखळ गावाला कोविड लस देण्याची किमया भेंडखळ ग्रामपंचायतीने करून दाखविली आहे .

ग्रामपंचायतीच्या सरपंच कु. भाग्यश्री चव्हाण , उपसरपंच लक्ष्मण ठाकूर आणि सर्व सदस्यांनी नुकताच एकमताने ठराव घेत संपूर्ण गाव व्हॅक्सिनेशन युक्त करण्याचा निर्णय घेतला होता . त्याची अंमलबजावणी आज रविवारी दिवसभर घेण्यात आलेल्या शिबिरातून करण्यात आली आहे . अतिशय नियोजनबद्ध पणे घेण्यात आलेल्या या व्हॅक्सिनेशन शिबिरात दिवसभरात गावातील साडेसातशे पेक्षा जास्त नागरिकांना कोविडच्या विरोधातील व्हॅक्सिन देऊन भेंडखळ गावाला कोरोनापासून सुरक्षित करण्यात आले आहे .

संपूर्ण गाव लसीकरणयुक्त करणारी भेंडखळ ही रायगड जिल्ह्यातीलच नव्हे तर कोकणातील पहिली ग्रामपंचायत ठरली आहे . त्याबद्दल ग्रामस्थानकडून ग्रामपंचायत पदाधिकारी व शासकीय अधिकारी यांचे खास अभिनंदन करण्यात येत आहे. यासाठी ग्रामपंचायतीने स्वतः पदरमोड करीत गावाला संरक्षित केले आहे.

उरण तालुक्यातील गावासाठी नेहमीच वेगवेगळे चांगले उपक्रम राबविण्यात अग्रेसर असलेली ग्रामपंचायत म्हणून भेंडखळचे नाव घेतले जाते . त्याचाच एक भाग म्हणून कोरोना साथीच्या आजाराला गावाच्या बाहेर हुसकावून लावण्याचा प्रयत्न भेंडखळ ग्रामपंचायतीच्या वतीने केला गेला आहे . कोरोनाचे लसीकरण सध्या तालुक्यात सुरू आहे मात्र लसीचे असणारे तुटपुंजे प्रमाण आणि ती मिळण्यासाठी नागरिकांची होणारी तारांबळ पाहता भेंडखळ ग्रामपंचायतीने गावातील नागरिकांचे मोफत लसीकरण करण्याचा निर्णय नुकताच घेतला होता. त्या अनुषंगाने आज गावातील प्राथमिक शाळेत उरणमधील डॉ. सत्या ठाकरे यांच्या माध्यमातून संपूर्ण भेंडखळ गावाला लसीकरण करण्याचा उपक्रम राबविण्यात आला.

यावेळी प्रत्येकी दहा दहाच्या गटाने नागरिकांना प्राथमीक शाळेच्या पहिल्या मजल्यावर नेऊन लसीकरण केले जात होते . गावकऱ्यांनी ही अतिशय शिस्तबद्ध रित्या या उपक्रमाच्या माध्यमातून आपापले लसीकरण करून घेतले . हा संपुर्ण कार्यक्रम यशस्वी करण्यासाठी सरंपच कु.भाग्यश्री चव्हाण , उपसरपंच लक्ष्मण ठाकूर यांच्यासह सदस्य कृष्णा ठाकूर , किशोर ठाकूर , रतन ठाकूर , योगिता ठाकूर , निलम भोईर , सोनाली ठाकूर , रुचिता ठाकूर , संध्या ठाकूर , निता ठाकूर , स्वाती घरत आणि ग्रामविकास अधिकारी श्री . डी . एम. तुरे हे सर्व जातीने उपस्थित राहून काम करतांना दिसून आले .

गावकरीही यावेळी अतिशय शिस्तबद्ध रित्या या लसीकरणाला सहकार्य करीत होते. ग्रामपंचायतीला सहकार्य म्हणून गावातील अनेक सामाजिक कार्यकर्ते ही या लसीकरण शिबिराच्या यशस्वीतेसाठी झटतांना दिसून आले . त्यामध्ये विजय ठाकूर , राम भगत , मच्छिंद्र घरत , सुरज ठाकूर आदी कार्यकर्ते या सामाजिक उपक्रमात अग्रेसर असल्याचे दिसून आले आहे.