गुन्हा

गुन्हा

बांधलेली मीच होते त्याच खांबाशी पुन्हा
खांब तो होता बदलला काय हा माझा गुन्हा

बंध ते असुनी जुने का दुःख ते माझ्या मना
सावरूनी चालते मी काय हा माझा गुन्हा

सापडावे वाटताना नेमक्या वळणावरी
हरवले माझ्यात मी ही काय हा माझा गुन्हा

भोवताली किर्रर्र झाडी भासे होती वेगळे
शोधिले साऱ्यात ते मी काय हा माझा गुन्हा

विसरले धागे जूने नी सोबतीला नव नवे
मन कधीचे जीर्ण झाले काय हा माझा गुन्हा

सई मराठे, पनवेल