पंतप्रधान मोदींच्या हस्ते स्वामित्व योजनेचा शुभारंभ

नवी दिल्ली : केंद्र सरकारच्या स्वामित्व योजनेचा शुभारंभ आज रविवारी सकाळी 11 वाजता पंतप्रधान नरेंद्र मोदी यांनी केला. या योजनेत नागरिकांना त्यांच्या संपत्तीच्या मालकीचे कार्ड देण्यात येणार आहे, या कार्डद्वारे बँकेतून कर्ज घेणे, तसेच अन्य कामे करणे सोपी होऊ शकतात.

पंतप्रधान नरेंद्र मोदींनी व्हिडीओ कॉन्फरंसद्वारे 6 राज्यांतील 763 खेडेगावांतील एक लाख लोकांना स्वामित्व योजनेच्या माध्यमातून घरांच्या प्रॉपर्टी कार्डचे वितरण केले. या सर्व लाभार्थ्यांनी त्यांचे स्वामित्व कार्ड ऑनलाईन डाऊनलोड केले होते. या प्रसंगी पंतप्रधान नरेंद्र मोदी म्हणाले की, “स्वामित्व योजना खेडेगावात राहणाऱ्या लोकांना आत्मनिर्भर बनण्यासाठी मदत करेल. आपल्याकडे असे म्हंटले जाते की भारताचा आत्मा हा त्याच्या खेडेगावांत आहे. पण वस्तुस्थिती अशी आहे की या खेडेगावांकडे आतापर्यंत कोणीही लक्ष दिले नाही. मी खेडेगावातील माझ्या बांधवांना त्यांच्या नशिबावर सोडून देणार नाही.”

ते पुढे म्हणाले की खेडेगावातील लोकांना आणि गरीबांना ते आहेत त्याच परिस्थितीत ठेवणे हा काही लोकांच्या राजकारणाचा भाग आहे. कृषीसंबंधी लागू करण्यात आलेल्या तीन नव्या ऐतिहासिक कायद्यांनाही त्यांचा विरोध आहे. त्यांचा विरोध हा शेतकऱ्यांच्या भल्यासाठी नसून त्यांच्या स्वत:साठी आहे.

पंतप्रधान नरेंद्र मोदींनी असेही म्हंटले आहे की जगात एक तृतीयांश लोकांकडेच त्यांच्या संपत्तीचे रेकॉर्ड उपलब्ध आहे. उरलेल्या दोन तृतीयांश लोकांकडे ही माहिती उपलब्ध नाही. अशा वेळी भारतासारख्या विकसनशिल देशातील लोकांकडे त्यांच्या संपत्तीचे रेकॉर्ड असणे आवश्यक आहे.

काय आहे योजना

1 या योजनेंतर्गत ग्रामीण भागातील नागरिकांना त्यांच्या संपत्तीचा उपयोग आर्थिक गोष्टींसाठी करण्यासाठी एक कार्ड दिले जाईल.

2 या कार्डाचा इतर योजनांसाठीही फायदा होणार आहे.

3 सुरुवातीला पहिल्या टप्प्यात 1 लाख नागरिकांना त्यांच्या मोबाईलवर संपत्ती कार्डची लिंक दिली जाईल. येथून हे कार्ड त्यांना डाऊनलोड करता येईल. नंतर प्रत्यक्ष कार्ड दिले जाईल.

4 विविध राज्यातील 763 गावांना याचा फायदा होणार आहे.

5 महाराष्ट्रातील 100, उत्तर प्रदेश 346, हरियाणा 221, मध्य प्रदेश 44, उत्तराखंड 50 आणि कर्नाटकातील 2 गावांचा यामध्ये समावेश आहे.

6 महाराष्ट्र वगळून इतर सर्व राज्यांमध्ये एका दिवसात कार्ड दिले जाईल. महाराष्ट्रात या कार्डसाठी काही शुल्क घेतले जाणार असल्याने त्याला 1 महिना लागणार असल्याचे म्हटले जात आहे.