रूग्णालयात व्हेंटिलेटर व ऑक्सिजन बेडची कमतरता
सिटी बेल लाइव्ह / संजय कदम / पनवेल ###
पनवेल महानगरपालिका क्षेत्र आणि ग्रामीण भागात कोरोना रुग्ण वाढत चालले आहेत. दरम्यान त्यामध्ये काहीना अगोदरच इतर आजार असल्याने त्यांना अधिक त्रास होतो. तसेच वयोवृद्ध रुग्णांची सुद्धा संख्या मोठी आहे. त्यांना ऑक्सीजन किंवा व्हेंटिलेटर बेडची आवश्यकता असते. दरम्यान अशा प्रकारचे बेड पनवेल परिसरात उपलब्ध होत नसल्याने व्हेंटिलेटर बेड मिळेल का? व्हेंटिलेटर बेड अशी म्हणण्याची वेळ आली आहे. दरम्यान ही गैरसोय पनवेलकरांकरीता जीवघेणे होत आहे. याबाबत नियोजन न करण्यात आल्याने रुग्ण आणि त्यांचे नातेवाईक हताश झाले आहेत. याबाबत त्वरित कार्यवाही करावी अशी मागणी जोर धरू लागली आहे.
पनवेल महानगरपालिका क्षेत्रात दिवसेंदिवस रुग्णांची संख्या वाढत चालली आहे. हा आकडा तीन हजारांच्याही वर पोहोचला आहे. दररोज त्यामध्ये भर पडत आहे. कोरोना नियंत्रणात आणण्याच्या दृष्टीकोनातून प्रशासनाकडून ठोस उपाययोजना करण्याची गरज आहे. पनवेल उपजिल्हा रुग्णालय व कामोठे एमजीएम या कोविड रुग्णालयात व्हेंटिलेटर आणि ऑक्सीजन बेड ची कमतरता असल्याची वस्तुस्थिती आहे. त्यामुळे कोरोना रुग्णांवर उपचार करताना अनेक अडचणींना सामोरे जावे लागत आहे. त्याचबरोबर संबंधित रुग्णांनासुद्धा आवश्यक तेवढे उपचार करताना डॉक्टरांचे हात तोकडे पडत आहेत. विशेष करून इतर आजार असलेल्या कोरोना पॉझिटिव्ह याशिवाय वयोवृद्ध कोविड रुग्णांची संख्या मोठी आहे. त्यांना व्हेंटिलेटर आणि ऑक्सीजन बेडची आवश्यकता आहे. परंतु या सुविधांची कमतरता असल्याने गंभीर प्रकृती असलेल्या रुग्णावर उपचार करताना अडचणी येत आहेत. दरम्यान विधानसभेचे विरोधी पक्षनेते देवेंद्र फडणवीस यांनी मागील आठवड्यात पनवेल येथे येऊन रुग्णांवरील उपचाराबाबत आढावा घेतला. त्यावेळी बेड उपलब्ध होत नसल्याचे त्याचबरोबर व्हेंटिलेटर व ऑक्सीजन ची कमतरता असल्याचे आमदार प्रशांत ठाकूर व आमदार महेश बालदी यांनी फडणवीस यांच्या निदर्शनास आणून दिले. यासाठी राज्य शासनाच्या आरोग्य विभागाने लक्ष देण्याची गरज असल्याचे मत विरोधी पक्ष नेत्यांनी व्यक्त केले होते. ऑक्सिजन आणि व्हेंटिलेटर बेडची सुविधा करून देण्याबाबतची मागणी राष्ट्रवादी काँग्रेस पक्षाचे जिल्हाध्यक्ष नगरसेवक सतीश पाटील यांनी वीस दिवसापूर्वी महापालिकेकडे केली आहे. महापालिकेने आणखी कोविड रूग्णालय सुरू करावेत अशी मागणी काँग्रेसचे पनवेल जिल्हा कार्याध्यक्ष सुदाम पाटील यांनी मागील आठवड्यात केली होती. दरम्यान मनपाने पाच खाजगी रुग्णालयांना कोरोना रुग्णांवर उपचार करण्याची मान्यता दिली आहे. हे हॉस्पिटल दोन दिवसातच रुग्णांनी भरून गेले आहे. त्यामुळे या ठिकाणी संपर्क साधला असता आमच्याकडे कोणता बेड शिल्लक नाही. असे संबंधित रुग्णालय व्यवस्थापनाकडून सांगण्यात येते. एकंदरीतच पनवेल परिसरात वाढत्या रुग्णांमुळे बेडच्या तुटवडा भासत आहे. पनवेल उपजिल्हा रुग्णालय आणि एमजीएम हॉस्पिटलची रुग्ण क्षमता जवळपास संपत आलेले आहे. इंडियाबुल्स याठिकाणी ऑक्सीजन व्हेंटिलेटरची सोय नसलेले तेथे प्रकृती गंभीर असलेल्या रुग्णांना ठेवता येत नाही. या कोविड केअर सेंटरमध्ये अनेक सुविधांचा वाणवा आहे. परिणामी कोरोनावर उपचार करणारी वैद्यकीय यंत्रणा हतबल झाली आहे.
व्हेंटिलेटर नसल्याने रुग्णांच्या जीविताला धोका
कोविड रुग्णालय इतके बेड तितके बेड अशा प्रकारचा आकडा प्रशासनाकडून सांगण्यात येत आहे. देवांशी इन हॉटेल आणि स्वास्थ्य रुग्णालयात सुद्धा बेडची सोय करण्यात आली आहे. मात्र ऑक्सीजन बेड नाहीत. स्वास्थ्य हॉस्पिटलमध्ये अद्यापर्यंत अतिदक्षता विभाग सुरू करण्यात आलेला नाही. परिणामी हे रुग्णालय केवळ नावापुरतेच असल्याचे दिसून आले. त्यामुळे अनेकदा ऑक्सिजनची सुविधा नसल्याने रुग्णांना कोविड रुग्णालयात ऍडमिट करून घेता येत नाही. या कारणाने त्यांना इतरत्र म्हणजेच खाजगी रुग्णालयात बेड शोधावा लागतो. पनवेल आणि नवी मुंबईतील खाजगी रुग्णालयातही व्हेंटिलेटर बेड मिळत नाहीत आणि जर मिळाला तरीसुद्धा त्या ठिकाणी उपचार घेणे सर्वांच्या खिशाला परवडते असे नाही. विशेष करून इतर आजार असणारे आणि वृद्ध कोरोना बाधित रुग्णांना ऑक्सीजन बेडची आवश्यकता असते. नेमकी त्याची पनवेल येथील कोविड रुग्णालयात कमतरता आहे. तसेच खाजगी रुग्णालयातही हीच अवस्था आहे.
Be First to Comment