नवघर बस स्थानक ते उरण चार फाटा रस्त्यावर गुडघाभर पाणी

वाहनधारकांना बोटीचा येतोय फिल

सिटी बेल लाइव्ह / अनंत नारंगीकर/ उरण #

उरण – पनवेल या दोन महत्त्वाच्या तालुक्याना जोडणाऱ्या सार्वजनिक बांधकाम खात्याच्या अखत्यारीत असलेला नवघर बस स्थानक ते उरण चार फाटा या रस्त्यावर मोठ्या प्रमाणात पावसाचे पाणी साचून राहत आहे.त्यामूळे या रस्त्यावरून मार्गक्रमण करणाऱ्या प्रवाशी नागरीकांना, वाहन चालकांना मोठी कसरत करावी लागत आहे.

सार्वजनिक बांधकाम विभाग उरण येथील कार्यालयातील अधिकारी वर्गाने पावसाळ्या पुर्वी आपल्या कार्याच्या अखत्यारीत असलेल्या उरण तालुक्यातील रस्त्यांचे डांबरीकरण, रुंदीकरण,खड्डे दुरुस्ती तसेच रस्त्यावरील पाण्याचा निचरा होण्यासाठी गटार बांधणे,गटार दुरुस्तीची कामे हाती न घेतल्याने सध्या तालुक्यातील अनेक रस्त्यावर खड्ड्यांचे साम्राज्य निर्माण झाले आहे.तसेच अनेक रस्त्यांवर सध्या पावसाचे पाणी साचून राहत आहे.

एकंदरीत सार्वजनिक बांधकाम खात्याच्या अशा ढिसाळ कारभाराचा नाहक त्रास हा या परिसरातील रहिवाशांना,वाहन चालकांना करावा लागत आहे. तरी सार्वजनिक बांधकाम विभाग उरण या कार्यालयातील अधिकारी वर्गाने तालुक्यातील सर्रास रस्त्याची पाहणी करून रस्त्यावर साचणाऱ्या पावसाच्या पाण्याचा निचरा करण्यासाठी तसेच रस्त्यावर पडलेले खड्डे दुरुस्ती करण्यासाठी पुढाकार घ्यावा अशी मागणी या रस्त्यावरून मार्गक्रमण करणारे वाहन चालक करत आहेत.