चौक ग्रामीण रुग्णालयात कोरोना स्वॅब तपासणी मशिनचे उदघाटन

लवकरच कोरोनाबाधितांसाठी दहा बेडसह आॅक्सिजन व्यवस्था

सिटी बेल लाइव्ह / रसायनी–राकेश खराडे #

चौक येथील ग्रामीण रुग्णालयात स्वॅब कोरोना तपासणी मशीनचे उदघाटन माजी आमदार मनोहर भोईर यांच्याहस्ते करण्यात आले.खालापुर तालुक्यातील ही पहिलीच स्वॅब तपासणी मशीन असणार आहे.त्यामुळे चौक मंडलासह वासांबे मोहोपाडा हद्दीतील सर्वसामान्य जनतेला दिलासा मिळाला आहे.
लॉकडाऊन शिथिल झाल्यानंतर चौक महसूल मंडळात कोरोना रुग्णांची संख्या दिवसेंदिवस वाढत जात आहे,आतापर्यंत २०२ रुग्ण सापडले असून ५ जणांचा मृत्यू झाला आहे.तर ५३ बरे होऊन घरी आलेल्यांची संख्या आहे.या परिसरातील कोरोना रुग्णांची वाढती संख्या पहाता माजी आमदार मनोहर भोईर,जिल्हा परिषद सदस्य मोतीराम ठोंबरे व माजी उपसभापती श्यामभाई साळवी यांनी सतत शासन दरबारी पाठपुरावा केला होता.कोरोना पाश्र्वभूमीवर तपासणी मशिनची समस्या लक्षात घेऊन यावेळी चौक ग्रामीण रुग्णालयाचे प्रभारी वैद्यकीय अधिकारी श्री बनसोडे यांनी जिल्हाधिकारी यांच्याकडे अहवाल व अत्यावश्यक गरज असल्याचे निदर्शनास आणून दिले.या सर्वांच्या सततच्या पाठपुराव्यामुळे ही मशीन उपलब्ध झाली आहे.रुग्णांचे नमुने मुंबई येथे जे.जे.हॉस्पिटलमध्ये पाठवण्यात येऊन त्याचा वैद्यकीय अहवाल अठ्ठेचाळीस तासात उपलब्ध होईल असे चौक आरोग्य केंद्राच्या यंत्रणेने बोलताना सांगितले.याप्रस़गी माजी आमदार मनोहर भोईर यांनी चौक ग्रामीण रुग्णालयातील बेडव्यवस्थेची पाहणी केली.अलिबाग येथील वैद्यकीय तपासणी केंद्र सुरू झाल्यावर त्याठिकाणी नमुने पाठविण्यात येतील असेही सांगण्यात आले.यावेळी माजी आमदार मनोहर भोईर यांनी याच रुग्णालयात दहा बेड व ऑक्सिजन सिलेंडर सह कोविड-१९ हे रुग्णालय काही दिवसातच सुरू करण्यात येणार असून कोविड रुग्णालयाच्या स्टाफसाठी वरिष्ठ पातळी प्रयत्न सुरू असल्याचे सांगितले.त्याचप्रमाणे रुग्णालयात ऑक्सिजन पाईपलाईनचे कामदेखील सुरू असल्याचे मोतीराम ठोंबरे यांनी सांगितले.
जिल्हा परिषद सदस्य मोतीराम ठोंबरे,माजी उपसभापती श्यामभाई साळवी,उपसरपंच सुरेश घाग,मनोहर देशमुख,सचिन मते आदी उपस्थित होते.