खांब विभागात पाच दिवसाचे गणपतींचे भक्तीमय वातावरणात विसर्जन

सिटी बेल लाइव्ह / खांब-रोहे ( नंदकुमार मरवडे ) 🔷🔶🔶🔷

गणेश चतुर्थीच्या दिवशी मोठ्या भक्तीमय वातावरणात घरोघरी आगमन झालेल्या गणरायांचे सहाव्या दिवशी मोठ्या जल्लोषात व भक्तीमय वातावरणात विसर्जन करण्यात आले.

अधून मधून कोसळणाऱ्या पावसाच्या सरी व कोरोना महामारीची तमा न बाळगता गणपती बाप्पा मोरया,पुढच्या वर्षी लवकर या अशाप्रकारचा जयघोष करीत खांब विभागातील तमाम गणेशभक्तानी आपल्या लाडक्या बाप्पांना भक्तीमय वातावरणात निरोप दिला.

गणेश चतुर्थीच्या मोठ्या आनंददायी वातावरणात गणरायाची घरोघरी स्थापना केल्यानंतर दररोज मनोभावे पूजन, भजन, आरती, हरिपाठ, किर्तन, जागर भजन आदी धार्मिक तथा अध्यात्मिक कार्यक्रमही सुरक्षित अंतर ठेऊन संपन्न करण्यात आले.

सध्या कोरोना महामारीचा वाढत चाललेला प्रादुर्भाव लक्षात घेता कुठेही धोका उत्पन्न होऊ नये यासाठी शासकीय नियमांचे तसेच सोशल डिस्टन्सिंगचे पालन करण्यात आले.व सँनेटायजरचा वापर करण्यात आला. पाच दिवसांचे विश्रांतीनंतर विसर्जनाचे सहाव्या दिवशी मोठ्या उत्साहात व भक्तीमय वातावरणात घरोघरी व सार्वजनिक ठिकाणी विराजमान झालेल्या बाप्पांना निरोप देण्यात आला.

विसर्जन मिरवणूकीत टाळ मृदंग वाजवित तसेच डिजेच्या तालावर नाच करून व स्पीकरवर लावलेल्या विविध स्वरूपातील गाणी लावून व नाचगाणे करीत सार्वजनिक तलाव, नद्या आदी ठिकाणी गणरायांचे विसर्जन करण्यात आले.