दीड दिवसाचे गणपती बाप्पांना भावपूर्ण वातावरणात निरोप

सिटी बेल लाइव्ह / खांब-रोहे (नंदकुमार मरवडे) 🔶🔷🔶🔷

“गणपती बाप्पा मोरया,पुढच्या वर्षी लवकर या”,”पायी हळू हळू चाला,मुखाने हरीनाम घ्या”अशा जयघोषात खांब-कोलाड विभागात दीड दिवसाचे गणपती बाप्पांना भावपूर्ण निरोप देण्यात आला.तर कोरोना महामारीचा वाढत चाललेला प्रकोप पाहता विसर्जनाच्या वेळी गणेशभक्तांनी सोशल डिस्टन्सिंग व कायदा सुव्यवस्थेचे पालन करुन कोरोनापासून सर्वांची लवकरच सुटका कर.अशाप्रकारचे साकडे विसर्जनाच्या वेळी भक्तांनी श्री.गणेशाला घातले.

गणेशोत्सवास प्रारंभ होण्यापूर्वी दोन तीन दिवसापूर्वीच पावसाने मुसळधार स्वरूपात बरसायला सुरूवात केली होती.तर गणेश चतुर्थीच्या दिवशीही सकाळपासून मोठ्या प्रमाणावर पाऊस बरसतच राहिल्याने गणेश भक्तांचा हिरमोड झाला.तर दीड दिवसाचे गणपती विसर्जनाच्या दिवशी पावसाने सकाळपासूनच संततधार लावली तसेच दीड दिवसाचे गणपती विसर्जनाच्या वेळी पावसाने ब-यापैकी उघडीप दिल्याने गणेश भक्तांना चांगलाच दिलासा मिळाला.

मुसळधार पाऊस व कोरोना महिमारीचा वाढत चाललेला प्रकोप या पार्श्वभूमीवरही गणेश भक्तांचा उत्साह मात्र ओसंडून वाहत होता.
खांब-कोलाड विभागातील विविध गावातील घराघरात मोठ्या संख्येने गणपती बाप्पांची स्थापना करण्यात आली. तर दीड दिवसाचे गणपतींचीही संख्या मोठी असल्याने विसर्जनाच्या वेळी रस्त्यावय व विसर्जनाच्या ठिकाणी फार मोठी गणेश भक्त व भगिनींची गर्दी दिसून येत होती.विसर्जनाच्या वेळी कोणताही अनुचित प्रकार घडू नये यासाठी ठिकठिकाणी चोख पोलिस बंदोबस्त ठेवण्यात आला होता.