रसायनी (आनंद पवार)
हिंदू धर्मात विशेष महत्त्व असलेला विजयादशमी अर्थात दसरा सण मंगळवारी साजरा होणार असल्याने रसायनी-मोहोपाडा परिसरातील बाजारपेठेत फुलांची मोठी रेलचेल पाहायला मिळत आहे.दसरा सणाच्या पार्श्वभूमीवर मुख्य बाजारपेठेतील रस्त्याच्या कडेला ठिकठिकाणी फुलांची दुकाने थाटण्यात आली असून,संपूर्ण बाजारपेठ झेंडू, शेवंती आणि विविध रंगीबेरंगी फुलांनी सजली आहे.सणाच्या खरेदीसाठी नागरिकांची लगबग सुरू झाली असून, फुलांनी बहरलेली बाजारपेठ सर्वांचे लक्ष वेधून घेत आहे.
दसरा हा साडेतीन मुहूर्तांपैकी एक शुभ मुहूर्त मानला जातो. या दिवशी घरासमोर झेंडूच्या फुलांचे तोरण बांधणे,वाहनांची पूजा करणे,तसेच आपट्याची पाने आणि फुले देवाला अर्पण करण्याची परंपरा आहे.त्यामुळे दरवर्षी दसऱ्याच्या काळात झेंडू आणि शेवंतीच्या फुलांना विशेष मागणी असते.यंदाही ही मागणी लक्षात घेऊन फुलविक्रेत्यांनी बाजारपेठेत विविध प्रकारची फुले विक्रीसाठी उपलब्ध केली आहेत.
फुलांचे दर प्रतिकिलो १०० रुपये
यंदा झेंडू आणि शेवंतीची फुले प्रतिकिलो १०० रुपये दराने विकली जात असल्याचे बाजारपेठेत दिसून येत आहे.दसरा सणासाठी आवश्यक असलेली फुले खरेदी करण्यासाठी नागरिक बाजारपेठेत गर्दी करत आहेत.घरांची सजावट,वाहनपूजा आणि धार्मिक विधींसाठी फुलांची खरेदी केली जात असल्याने फुलविक्रेत्यांमध्येही उत्साहाचे वातावरण आहे.
दुष्काळसदृश परिस्थितीतही सणाचा उत्साह कायम
यंदा राज्यातील काही भागांत कमी पावसामुळे शेती आणि शेतकरी अडचणीत सापडले आहेत.पावसाचे प्रमाण कमी राहिल्याने सर्वसामान्य शेतकऱ्यांसमोर आर्थिक संकट उभे राहिले आहे.अशा प्रतिकूल परिस्थितीतही नागरिक आपापल्या परीने सण-उत्सव आनंदाने साजरे करण्याचा प्रयत्न करत आहेत.दसऱ्याचे धार्मिक आणि सांस्कृतिक महत्त्व लक्षात घेऊन नागरिकांनी सणाच्या तयारीला सुरुवात केली आहे.एकीकडे महागाई आणि आर्थिक अडचणींचे सावट असले,तरी दुसरीकडे विजयादशमीच्या स्वागतासाठी बाजारपेठेत दिसणारी फुलांची सजावट,खरेदीसाठी होणारी गर्दी आणि नागरिकांचा उत्साह यामुळे मोहोपाडा बाजारपेठेला सणासुदीचे स्वरूप प्राप्त झाले आहे.एकंदरीत,विजयादशमीच्या स्वागतासाठी सजलेली मोहोपाडा बाजारपेठ आणि फुलांच्या खरेदीसाठी होणारी नागरिकांची लगबग यामुळे परिसरात दसऱ्याचा उत्साह ओसंडून वाहताना दिसत आहे.
Be First to Comment