जिल्हाधिकाऱ्यांकडून मागासवर्गीय कर्मचाऱ्यांच्या गृहनिर्माण प्रश्नाची दखल

रायगड : याकूब सय्यद

कास्ट्राईब कर्मचारी महासंघाच्या वतीने मागासवर्गीय शासकीय कर्मचाऱ्यांच्या निवासासाठी जागा उपलब्ध करून देण्याबाबत रायगड जिल्हाधिकाऱ्यांकडे सातत्याने पाठपुरावा करण्यात येत होता. या मागणीची सकारात्मक दखल घेत जिल्हाधिकारी श्री. किशन जावळे यांनी जिल्ह्यातील सर्व तहसील कार्यालयांना तातडीने पत्र निर्गमित करून जागा उपलब्ध करून देण्याबाबत निर्देश दिले आहेत.
प्रशासनाच्या या गतिमान निर्णयाबद्दल कास्ट्राईब कर्मचारी महासंघाच्या वतीने जिल्हाधिकाऱ्यांचे विशेष आभार मानण्यात आले.

महासंघाचे महाराष्ट्र प्रदेशाध्यक्ष, महासचिव आणि प्रदेश कार्यकारिणीच्या सूचनेनुसार जिल्हा कार्यकारिणीने नुकतीच जिल्हाधिकाऱ्यांची प्रत्यक्ष भेट घेतली. यावेळी जिल्हाधिकारी श्री. किशन जावळे यांचा सन्मान करून त्यांना भारतीय संविधानाची प्रत सप्रेम भेट देण्यात आली. या भेटीदरम्यान केवळ निवासाच्या जागेचा प्रश्नच नव्हे, तर मागासवर्गीय कर्मचाऱ्यांच्या प्रलंबित असलेल्या १ ते २२ विविध समस्यांवर सविस्तर चर्चा करण्यासाठी स्वतंत्र बैठक आयोजित करण्याबाबतचे निवेदनही सादर करण्यात आले.

याप्रसंगी कास्ट्राईब कर्मचारी महासंघाचे जिल्हाध्यक्ष संजीव मोरे, कास्ट्राईब कर्मचारी महसूल जिल्हाध्यक्ष राहुल सूर्यवंशी आणि संघटनेचे इतर प्रमुख पदाधिकारी मोठ्या संख्येने उपस्थित होते.
जिल्हाधिकाऱ्यांनी दाखवलेल्या सकारात्मक प्रतिसादामुळे कर्मचाऱ्यांमध्ये आनंदाचे वातावरण असून, आगामी काळात प्रलंबित प्रश्नांचीही लवकरच तड लागेल, असा विश्वास संघटनेच्या वतीने व्यक्त करण्यात आला आहे.