पीएनपी चषकाचा दर्जा अधिक उंचावेलजयंत पाटील यांचे प्रतिपादन

• निमंत्रित 24 संघामध्ये होणार लढत ; आयपीएलच्या धर्तीवर मिळणार अलिबागमध्ये क्रिकेट खेळाचा आनंद

| अलिबाग | प्रतिनिधी |
रायगड जिल्ह्यातील क्रिकेट खेळाडूंना हक्काचे व्यासपिठ मिळावे, यासाठी नृपाल पाटील, चित्रलेखा पाटील यांच्या पुढाकाराने गतवर्षी पासून पीएनपी चषक क्रिकेटचे आयोजन करण्यात आले आहे. गेल्यावर्षी झालेली पीएनपी चषक क्रिकेट स्पर्धा राज्यभर गाजली. पीएनपी चषकाचे हे दुसरे वर्ष आहे. योग्य नियोजन व व्यवस्थापनामुळे याही वर्षी स्पर्धेचा दर्जा अधिक उंचावेल असा विश्वास आहे, असे प्रतिपादन शेकाप सरचिटणीस जयंत पाटील यांनी केले.
पीएनपी चषकाचे अनावरण व खेळाडूंचा लिलाव सोहळा बुधवारी (दि. 05) कुरुळ येथील क्षात्रैक्य समाज हॉलमध्ये घेण्यात आला. यावेळी जयंत पाटील बोलत होते.

यावेळी शेकापचे ज्येष्ठ नेते द्वारकानाथ नाईक, अलिबाग नगरपरिषदेचे माजी नगराध्यक्ष प्रशांत नाईक, पीएनपी चषकाचे आयोजक नृपाल पाटील, शेकाप जिल्हा महिला आघाडी प्रमुख चित्रलेखा पाटील,शेकाप राज्य कामगार संघटनेचे अध्यक्ष प्रदिप नाईक, शेकाप तालुका चिटणीस अनिल पाटील, रायगड बाजारचे उपाध्यक्ष प्रमोद घासे, आदी मान्यवरांसह संघ मालक, संघाचे व्यवस्थापक, कर्णधार मोठ्या संख्येने उपस्थित होते.

याप्रसंगी जयंत पाटील म्हणाले की, रायगड जिल्ह्याचे भाग्यविधाते, शेतकरी, कामगार व कष्टकऱ्यांचे कैवारी, जिल्हा परिषदेचे माजी अध्यक्ष प्रभाकर पाटील यांच्या नावाने ही स्पर्धा भरविण्यात आली आहे. अनेकांनी सोशल मिडीयावर ही स्पर्धा पाहिली.पीएनपी चषकाचे दर्जेदार असे सामने झाले. क्रिकेटचा दर्जा व व्यवस्थापनाबाबत राज्यातून भरपूर कौतूक करण्यात आले.पीएनपी चषकाचे हे दुसरे वर्ष आहे. क्रिकेट खेळाडूंना एक चांगली संधी देण्याचा प्रयत्न करण्यात आला असून जिल्ह्यातील क्रिडा प्रेमींनादेखील अलिबागमध्ये आयपीएलच्या धर्तीवर क्रिकेटचे सामने पहावयास मिळत असल्याचा आनंद आहे, असे शेकाप सरचिटणीस जयंत पाटील यांनी सांगितले.

-पीएनपी चषकाचे जल्लोषात अनावरण

कुरुळ येथील क्षात्रैक्य समाज हॉलमध्ये पीएनपी चषकाचे अनावरण जल्लोषात करण्यात आले. शेकापचे सरचिटणीस जयंत पाटील यांच्या प्रमुख उपस्थितीत हा सोहळा पार पडला. दरम्यान क्रिकेटमधील खेळाडूंची लिलाव प्रक्रीयेला सुरुवात करण्यात आली. सुरुवातीला पीएनपी चषकाचे अनावरण करण्यात आले. भव्यदिव्य व आकर्षक अशा चषकाचे मान्यवरांच्या हस्ते अनावरण झाले. त्यानंतर खेळाडूंचा लिलाव करण्यात आला. पाचशे पासून ते 35 हजार पॉईंटपर्यंत लिलाव ठेवण्यात आला आहे. लिलाव प्रक्रियेला उत्स्फुर्त प्रतिसाद मिळाला. एक वेगळा उत्साह या निमित्ताने दिसून आला. संपुर्ण कार्यक्रमाचे सुत्रसंचलन संदीप जगे यांच्याकडून करण्यात आले आहे.

पीएनपी चषकाचे हे दुसरे पर्व आहे.गतवर्षी झालेल्या या स्पर्धेचे नियोजन उत्तम केले होते. एकापेक्षा एक खेळ पहावयास मिळाले. माझा संघ अंतिम विजेता ठरला. त्यावेळी टीमच्या सर्व खेळाडूंसह अनेकांचे सहकार्य मिळाले. राज्यात पीएनपी चषकाचे नाव एक वेगळ्या उंचीवर पोहचले आहे.

सुरेश घरत – संघ मालक

क्रिकेटचा महासंग्राम रंगणार

रायगड जिल्हा परिषदेचे माजी अध्यक्ष स्व. प्रभाकर पाटील यांच्या स्मृती प्रित्यर्थ शेतकरी कामगार पक्ष, पुरोगामी युवक संघटना पुरस्कृत यु.व्ही. स्पोर्टस्‌‍ ॲकेडमी आयोजित अलिबाग, मुरूड व रोहा तालुका मर्यादीत डे नाईट क्रिकेट स्पर्धेचे आयोजन करण्यात आले आहे. 19 ते 23 फेब्रुवारी या कालावधी क्रीकेटचा महासंग्राम कुरूळ येथील आझाद मैदानात रंगणार आहे.

मुरूड डिफेन्डर्स, शहापूर स्मॅशर्स, खंडाळे स्टॅलिअन्स, आंबेपूर टायगर्स, रामराज रायडर्स, चौल चेसर्स, रेवदंडा रॉयल्स, वळके अवेंजर्स, बेलोशी, बीग बुल्स, नांदगांव निंजास, मापगाव मार्वल्स, मुरूड थंडर्स, कुर्डूस किंग, चेंढरे चॅम्पीयन, सारळ स्ट्रायकर्स, उसरोली वंडर्स, खारगांव हंटर्स, वरसोली चॅलेंजर्स, थळ टायपहुन्स , आवास अल्फास, अलिबाग वॉरिअर्स, अलिबाग सुपर किंग, रोहा रेंजर्स, राजपूरी पॅथर्स या निमंत्रित 24 संघाचा स्पर्धेत समावेश असणार आहे.

शेकापचे युवा नेते नृपाल पाटील, जिल्हा महिला आघाडी प्रमुख चित्रलेखा पाटील यांच्या संकल्पनेतून स्पर्धेचे दुसरे पर्व आहे. अलिबाग, रोहा, मुरूड या तीन तालुका मर्यादीत या स्पर्धा होणार आहेत. स्पर्धेतील प्रथम क्रमांकाला पाच लाख रुपये व चषक, द्वीतीय क्रमांकाला तीन लाख रुपये व चषक व तृतीय क्रमांकाला दोन लाख रुपये व चषक तसेच विविध आकर्षक बक्षिसे देऊन गौरविण्यात येणार आहे. ही स्पर्धा ऑनलाईन घरबसल्या बघण्याची व्यवस्था केली आहे. अलिबागसह रायगड जिल्ह्यातील व जिल्हा, राज्य, देशाबाहेरील क्रिडा प्रेमींना या स्पर्धेचा आनंद यातून घेता येणार आहे.