अभिजित कोसंबी यांच्या गाण्यानं दुमदुमला पीएनपीचा परिसर

पीएनपी वेश्‍वी शैक्षणिक संकुलाद्वारे प्रभाविष्कार या सांस्कृतिक सोहळ्याचे १८ ते २१ डिसेंबर या दरम्यान आयोजन

। अलिबाग । धनंजय कवठेकर।

पीएनपी वेश्‍वी शैक्षणिक संकुलाद्वारे प्रभाविष्कार या सांस्कृतिक सोहळ्याचे १८ ते २१ डिसेंबर या दरम्यान आयोजन करण्यात आलेले होते. प्रभाविष्कार २०२४ अंतर्गत कनिष्ठ व वरिष्ठ महाविद्यालयाचा सांगता समारंभ २१ डिसेंबरला महाराष्ट्राचा महागायक अभिजीत कोसंबी यांच्या उपस्थितीत पार पडला. झी मराठी या दूरचित्रवाणी वाहिनीवरील सारेगम संगीत स्पर्धेतील पहिले महागायक होण्याचा सन्मान त्यांनी मिळवला आहे.

कार्यक्रमाच्या उद्घाटन प्रसंगी त्यांनी अवधूत गुप्ते प्रस्तुत पावनखिंड या सिनेमातील गाणं राजं आलं, राजं आलं जिंकूनिया जगभरी “शिवबा राजं” नाव गाजं जी… या गाण्याने सुरुवात केली आणि सर्वांना मंत्रमुग्ध केले. या कार्यक्रमात त्यांनी विविध गाणी गाऊन प्रेक्षकांना आणि विद्यार्थ्यांना पर्वणी दिली.

प्रभाविष्कार या सांस्कृतिक सोहळ्यात कनिष्ठ व वरिष्ठ महाविद्यालयाच्या विद्यार्थ्यांनी विविध गुणदर्शनाच्या कार्यक्रमाचे सादरीकरण केले तसेच पीएनपीचे आजी माजी विद्यार्थ्यांना नवरत्न पुरस्कार देऊन गौरविण्यात आले, यामध्ये प्रज्योत पाटील – सामाजिक क्षेत्र, मानसी नागावकर – शैक्षणिक क्षेत्र, श्रुती टोपले – शैक्षणिक क्षेत्र, जयेश पाटील – कला क्षेत्र, सानिया म्हात्रे – कला क्षेत्र, सुयोग आंग्रे- साहित्य क्षेत्र, रितेश शिरोसे- अष्टपैलू, मनोज मेंगाळ – क्रीडा क्षेत्र, करण भगत – क्रीडा क्षेत्र यांना मान्यवरांच्या हस्ते सन्मान करण्यात आला.

या सोहळ्यास संस्थेच्या कार्यावह चित्रलेखा नृपाल पाटील, बीड, केज येथील शेकाप राज्य चिटणीस मंडळ सदस्य भाई मोहन गुंड, रायगड जिल्हा पत्रकार संघाचे उपाध्यक्ष नागेश कुलकर्णी, डॉ. राजेंद्र चांदोरकर,विविध ग्रामपंचायतीचे सरपंच, सदस्य तसेच पत्रकार व इतर मान्यवरांसह कॉलेजचे संचालक विक्रांत वार्डे, कॉलेजचे प्र. प्राचार्य डॉ. ओमकार पोटे, प्राचार्य रविंद्र पाटील, मुख्य कार्यालयाचे पदाधिकारी तसेच राजकीय, सामाजिक, शैक्षणिक, क्रीडा, आरोग्य, सांस्कृतिक क्षेत्रातील मान्यवर, शिक्षक शिक्षकेत्तर कर्मचारी, सर्व शाळांचे मुख्याध्यापक, कॉलेजचे प्राचार्य विद्यार्थी, पालक बहूसंख्येने उपस्थित होते.
विविध गुणदर्शनाचा कार्यक्रम संपन्न झाल्या नंतर महागरब्याचे आयोजन करण्यात आले होते याचा सर्वांनी मनमुरादपणे आनंद लुटला.