भाजपच्या शेकडो कार्यकर्त्यांचा राष्ट्रवादीमध्ये प्रवेश

राष्ट्रवादी काँग्रेसचे पनवेल महानगरपालिका जिल्हा अध्यक्ष तथा नगरसेवक सतीश पाटील यांच्या नेतृत्वाखाली राष्ट्रवादी होतेय बळकट

सिटी बेल लाइव्ह । पनवेल ।

पनवेल जिल्हा राष्ट्रवादी काँग्रेसच्या विस्तारित कार्यकारणी मध्ये भारतीय जनता पक्षातील शेकडो कार्यकर्त्यांचा राष्ट्रवादी काँग्रेस पक्षामध्ये प्रवेश पार पडला.

यावेळी भारतीय जनता पक्षाचे मंडळ सरचिटणीस प्रशांत रणवरे यांनी राष्ट्रवादी काँग्रेस पक्षामध्ये राष्ट्रवादी काँग्रेसचे राष्ट्रीय महासचिव खासदार सुनील तटकरे यांच्या उपस्थितीत जाहीर प्रवेश केला.

पनवेल महानगरपालिका जिल्ह्याचे अध्यक्ष व नगरसेवक सतीश पाटील यांच्या विशेष प्रयत्नातून भारतीय जनता पक्षातून कार्यकर्त्यांचा प्रवेश राष्ट्रवादीकडे येण्यासाठी सुरुवात झाली आहे. हा झंजावात असाच पुढे कायम राहील असा विश्वास व्यक्त करून पनवेल महानगरपालिका निवडणुकीसाठी कार्यकर्त्यांनी तयारीला लागावे अशा सूचना खासदार तटकरे यांनी यावेळी दिल्या.

सदर बैठकीला महाराष्ट्र प्रदेश राष्ट्रवादी काँग्रेस पक्षाचे सरचिटणीस प्रशांत पाटील, महिला काँग्रेसच्या निरीक्षक भावनाताई घाणेकर, राष्ट्रवादी काँग्रेसचे महाराष्ट्र सचिव सुरदास गोवारी उपस्थित होते.

पनवेल शहर जिल्हा राष्ट्रवादी काँग्रेस पक्षाचा कार्य अहवाल जिल्हा अध्यक्ष सतीश पाटील व कार्यकारी अध्यक्ष शिवदास कांबळे यांनी मांडून पालकमंत्री आदिती तटकरे यांच्या माध्यमातून होत असलेल्या जनतेच्या कामाचा फायदा दुष्काळामध्ये होईल असा विश्‍वास यावेळी व्यक्त करण्यात आला.

यावेळी विविध पक्षातून कार्यकर्त्यांनी प्रवेश केला. तसेच राष्ट्रवादी काँग्रेसच्या जिल्हा कार्यकारिणीचे पदाधिकारी सगळ्या शहरांचे अध्यक्ष व विविध देशांचे अध्यक्ष व त्यांचे पदाधिकारी मोठ्या संख्येने कार्यक्रमासाठी उपस्थित होते.