पोलीस नाईक भाऊसाहेब लोंढे कळंबोली ते पनवेल करतात सायकल प्रवास
सिटी बेल लाइव्ह । पनवेल । संजय कदम ।
कोरोना विषाणूच्या पार्श्वभूमीवर त्याचा त्रास होवू नये व फिट रहावे या उद्देशाने पनवेल शहर पोलीस ठाण्यातील काही कर्मचारी आता सायकलिंग करून स्वतःला तंदुरुस्त ठेवत आहेत व एक आगळावेगळा आदर्श इतर पोलीस बांधवांसाठी त्यांनी ठेवला आहे.
कोरोनामध्ये अनेकांनी त्रास सहन केला आहे. जो फिट राहील, नियमित चालेल-फिरेल तो कोरोनापासून लांब राहील. त्यामुळे अनेक पोलीस कर्मचारी आपल्या कामातून वेळ काढून व्यायाम, योगा नियमित करीत असतात. अशामध्ये काही पोलीस कर्मचार्यांनी घरातूनच निघताना ते सायकल घेवून निघतात व पोलीस ठाण्यात आल्यावर ठरलेल्या ठिकाणी सुद्धा सायकलीवरुनच जातात. यामुळे त्यांची ऑक्सिजन लेव्हल सुद्धा वाढते, भूक वाढते व हाता-पायाला व्यायाम मिळतो व मुख्यतः ते प्रदुषणमुक्त राहतात.
अशाच प्रकारे पनवेल शहर पोलीस ठाण्यात कार्यरत असणारे पोलीस नाईक भाऊसाहेब लोंढे रहायला कळंबोलीला आहेत. परंतु ते नियमित राहत्या घरापासून पनवेल शहर पोलीस ठाण्यात सायकलवर येतात. त्यानंतर ज्या ठिकाणी त्यांना कर्तव्य बजाविण्यास सांगण्यात आले असते त्या ठिकाणी सुद्धा ते सायकलवर जातात. जास्तीत जास्त पोलीस ठाण्याची कामे ते सायकलवरुन करतात व दुचाकी व चारचाकी वाहनांचा प्रवास करण्याचे टाळतात. यासाठी त्यांनी टाटा कंपनीची स्पायडर ही सायकल खरेदी केली आहे. या सायकलमुळे त्यांना नियमित चांगला व्यायाम मिळतो असे त्यांनी सांगितले.
आतापर्यंत त्यांची नोकरीत 11 वर्षे पूर्ण झाली आहेत. आगामी काळात सुद्धा जास्तीत जास्त वेळ सायकलवर करणार असल्याचे त्यांनी सांगितले. त्यांच्या बरोबरच्या मित्रपरिवाराने, कर्मचार्यांनी सुद्धा सायकलचा वापर दररोज करावा. त्यामुळे पेट्रोलचे पैसे वाचतात तसेच प्रदुषण सुद्धा कमी होते व आपल्याला सुद्धा ऑक्सिजन मिळते, असे त्यांनी सांगितले आहे. या त्यांच्या आगळ्या वेगळ्या उपक्रमाचे पोलीस दलाकडून कौतुक करण्यात येत आहे.
Be First to Comment