उरण नपाच्या कचराकुंडीत पीपीइ किट

सिटी बेल लाइव्ह / उरण (घन:श्याम कडू) :

उरण नगरपालिकेच्या कार्यालयाच्या कचराकुंडीत दवाखान्यात वापरून झालेले पीपीइ किट सापडल्याने खळबळ माजली आहे. आज सकाळी उरण नगरपालिकेच्या पाण्याच्या टाकीखाली असणाऱ्या कचराकुंडीत दवाखान्यात वापरून झालेले पीपीइ किट सापडले आहेत.

याबाबत त्या ठिकाणी असलेल्या कामगारांकडे विचारणा केली असता त्यांनी आम्हांला काहीच माहिती नसल्याचे उत्तर दिले. मग नगरपालिका हद्दीतील कचराकुंडीत हे पीपीइ किट आले कुठून एकतर कोणा कामगारांनी अथवा अज्ञात इसमांनी टाकले असल्याचा संशय व्यक्त केला जात आहे. मात्र कार्यालयाच्या सुरक्षेसाठी वॉचमन असतानाही अशी घटना घडल्याने आश्चर्य व्यक्त केले जात आहे.

सदर पीपीइ किट लहान मुले अथवा मोठी माणसं तसेच कुत्रे किंवा इतर जनावरांनी त्यांना हाताळले तर कोरोनाचा प्रादुर्भाव होण्याची दाट शक्यता आहे. ज्यांनी कोणी हे किट वापरले त्यांनी याची योग्य प्रकारे विल्हेवाट लावणे जरुरीचे होते. त्यांनी तसे न करता आपली जबाबदारी झटकत हे किट नगरपालिका हद्दीतील कचराकुंडीत टाकल्याने उरणमध्ये चर्चेला उधाण आले आहे.

आज सकाळी टाकण्यात आलेले पीपीइ किट संध्याकाळ झाली तरी त्याची विल्हेवाट लावण्यात आली नव्हती. उद्या याचे दुष्परिणाम झाले तर त्याची जबाबदारी कोण घेईल असा सवाल उरण शहरातील जनता करीत आहे. कोरोनाच्या वाढत्या प्रादुर्भावामुळे या परिसरात कोणीही फिरताना दिसत नाही.

याबाबत उरणचे मुख्याधिकारी संतोष माळी यांच्याशी फोनद्वारे अनेकवेळा संपर्क साधण्याचा प्रयत्न केला परंतु तो होऊ शकला नाही. नगरपालिकेचे आरोग्य विभागाचे प्रमुख महेश लवटे यांच्याकडे विचारणा केली असता त्यांनी विचारून सांगतो असे सांगितले पण त्यांनीही याबाबत काहीही सांगितले नाही. त्यामुळे उरणमध्ये चर्चेला उधाण आले आहे.