पनवेल : मायनॉरिटी उर्दू गर्ल्स हायस्कूलच्या विद्यार्थिनींसाठी ५ ऑक्टोबर, सोमवार रोजी सय्यद अब्दुल रहमान हाजी मलंग बाबा यांच्या डोंगरावर विशेष शैक्षणिक व मनोरंजक सहलीचे आयोजन करण्यात आले. या सहलीत विद्यार्थिनींना शिक्षणासोबतच आध्यात्मिक वातावरण, निसर्ग, संस्कृती आणि साहसाचा अनोखा अनुभव मिळाला.
फजरच्या नमाजानंतर पनवेलहून शाळेची बस हाजी मलंगच्या दिशेने रवाना झाली. शाळेच्या मुख्याध्यापिका कुदसिया प्रिमुसवाला यांच्यासह शिक्षकवर्ग आणि शाळेची संपूर्ण टीम विद्यार्थिनींसोबत उपस्थित होती.
हाजी मलंग येथे पोहोचल्यानंतर विद्यार्थिनींनी दर्ग्यात जाऊन दर्शन घेतले व प्रार्थना केली. शांत आणि आध्यात्मिक वातावरणात विद्यार्थिनींनी नात पठण तसेच शेरोशायरीमध्ये सहभाग घेतला. याशिवाय विविध खेळांचे आयोजन करण्यात आले होते. विद्यार्थिनींनी डोंगरावर ट्रेकिंगचाही आनंद घेतला.
या सहलीचा उद्देश केवळ मनोरंजन नसून विद्यार्थिनींना वर्गखोलीच्या बाहेर प्रत्यक्ष अनुभवातून शिकण्याची संधी देणे हा होता. विविध सामूहिक उपक्रमांमधून विद्यार्थिनींमध्ये आत्मविश्वास, शिस्त, संघभावना आणि परस्पर सहकार्याची भावना विकसित करण्यास मदत झाली.
या संपूर्ण कार्यक्रमाचे आयोजन हलीमाबाई झुलेवाली ट्रस्टच्या वतीने करण्यात आले. ट्रस्टचे मुख्य विश्वस्त हनिफ कच्छी सकाळपासून कार्यक्रमाच्या शेवटपर्यंत विद्यार्थिनी व शाळेच्या टीमसोबत उपस्थित होते.
मुख्याध्यापिका कुदसिया प्रिमुसवाला तसेच शिक्षकांनी विद्यार्थिनींना मार्गदर्शन करून विविध उपक्रमांमध्ये त्यांचा उत्साह वाढवला.
ट्रस्टच्या वतीने भविष्यात इतर शाळांमधील विद्यार्थी व विद्यार्थिनींसाठीही अशाच प्रकारच्या शैक्षणिक आणि अनुभवाधारित सहली आयोजित करण्याचा मानस व्यक्त करण्यात आला. विद्यार्थ्यांना पुस्तकातील शिक्षणासोबतच निसर्ग, संस्कृती, इतिहास आणि प्रत्यक्ष जीवनातील विविध अनुभव मिळावेत, हा या उपक्रमामागील उद्देश आहे.
मायनॉरिटी उर्दू गर्ल्स हायस्कूलच्या विद्यार्थिनींसाठी ही सहल शिक्षण, आध्यात्मिकता, मनोरंजन आणि साहस यांचा सुंदर संगम ठरली.
Be First to Comment