खोपोली : प्रतिनिधी
मुंबई–पुणे द्रुतगती मार्गावरील बोरघाटात अपघातांचे प्रमाण कमी करण्यासाठी अपर पोलीस महासंचालक (वाहतूक) प्रविण साळुंके, महामार्ग पोलीस, रायगड परिक्षेत्राचे पोलीस अधीक्षक तिरुपती काकडे, पोलीस उपअधीक्षक पुष्पलता दिघे आणि पोलीस निरीक्षक भरत शेंडगे, यांच्या मार्गदर्शनाखाली बोरघाट महामार्ग पोलीस यंत्रणेचे सहाय्यक पोलीस निरीक्षक स्वप्निल पाटील यांच्या माध्यमातून विविध प्रतिबंधात्मक उपाययोजना राबविण्यात येत आहेत. या उपाययोजनांना सकारात्मक परिणाम मिळत असून, पोलीस केंद्राच्या हद्दीत जवळपास 100 (112) दिवसांचा मृत्यूविरहित कालावधी नोंदविण्यात आला आहे. अवघड भौगोलिक परिस्थिती, वाहनांची मोठी वर्दळ आणि संवेदनशील वळणे असलेल्या बोरघाट परिसरात ही कामगिरी महत्त्वपूर्ण मानली जात आहे.
अपघात प्रतिबंधासाठी केवळ अपघात घडल्यानंतर मदत करण्यावर भर न देता, अपघात होऊ नयेत यासाठी प्रतिबंधात्मक उपाययोजनांवर महामार्ग पोलिसांनी विशेष लक्ष केंद्रित केले आहे.
धोकादायक ठिकाणांची ओळख करून उपाययोजना
मुंबई–पुणे द्रुतगती मार्ग तसेच राष्ट्रीय महामार्गावरील धोकादायक आणि संवेदनशील ठिकाणे निश्चित करून त्या ठिकाणी आवश्यक त्या उपाययोजना करण्यात आल्या आहेत. वाहनचालकांना संभाव्य धोके आधीच लक्षात यावेत यासाठी सूचना आणि सावधानतेचे फलक लावण्यात आले आहेत. महत्त्वाच्या ठिकाणी फिक्स पॉईंट निश्चित करून वाहतुकीवर लक्ष ठेवण्यासोबतच आवश्यकतेनुसार वाहतूक नियमन करण्यात येत आहे. विशेषतः द्रुतगती मार्गावरील ब्लॅकस्पॉटच्या ठिकाणी आवश्यक उपाययोजना करून वाहनचालकांना सतर्क करण्यावर भर देण्यात आला आहे.
रात्रगस्त आणि पेट्रोलिंगला प्राधान्य
महामार्गावरील वाहतूक सुरळीत आणि सुरक्षित राहावी यासाठी रात्रगस्त तसेच नियमित पेट्रोलिंग करण्यात येत आहे. वाहनांची तपासणी, नियमभंग करणाऱ्यांवर लक्ष आणि महामार्गावरील संभाव्य अडथळे याबाबत पोलीस यंत्रणा सतर्क ठेवण्यात आली आहे. अपघात किंवा वाहतुकीत अडथळा निर्माण झाल्यास घटनास्थळी तातडीने पोहोचून वाहतूक सुरळीत करण्यासोबतच अपघातग्रस्तांना आवश्यक मदत उपलब्ध करून देण्यावरही भर देण्यात येत आहे.
प्रबोधन आणि कारवाईचा समतोल
अपघात प्रतिबंधामध्ये वाहनचालकांचे प्रबोधन हा महत्त्वाचा भाग ठरला आहे. वेगमर्यादेचे पालन, सुरक्षित अंतर, धोकादायक ओव्हरटेक टाळणे, मद्यपान करून वाहन न चालविणे, मोबाईलचा वापर टाळणे आणि सीट बेल्टचा वापर याबाबत वाहनचालकांना सातत्याने मार्गदर्शन केले जात आहे. त्याचवेळी वाहतूक नियमांचे उल्लंघन करणाऱ्यांवर मोटार वाहन कायद्यानुसार कारवाई करण्यात येत आहे. उपलब्ध माहितीनुसार, जुलै 2026 मध्ये 6,876 तर ऑगस्ट 2026 मध्ये 9,783 कारवाया करण्यात आल्या. तसेच जानेवारी ते ऑगस्ट 2026 या कालावधीत मद्यप्राशन करून वाहन चालविणाऱ्या चालकांविरोधात 94 प्रकरणांत कारवाई करण्यात आली.
जवळपास 100 दिवसांचा मृत्यूविरहित कालावधी महत्त्वाचा
बोरघाटसारख्या संवेदनशील महामार्ग परिसरात 112 दिवस प्राणांतिक अपघात न होणे ही अपघात प्रतिबंधाच्या दृष्टीने महत्त्वपूर्ण बाब आहे. या कालावधीमागे केवळ एका उपाययोजनेचा परिणाम नसून प्रबोधन, पेट्रोलिंग, रात्रगस्त, सूचना फलक, वाहतूक नियमन आणि नियमभंगावरील कारवाई अशा विविध स्तरांवरील प्रयत्नांचा एकत्रित परिणाम आहे.
ही कामगिरी पुढील काळात अधिक सुरक्षित महामार्गासाठी काम करण्याची प्रेरणा देणारी ठरत आहे. अपघातांची संख्या कमी करण्यासाठी प्रतिबंधात्मक उपाययोजना अधिक प्रभावीपणे राबविण्याचा प्रयत्न महामार्ग पोलिसांकडून सुरू आहे.
सुरक्षित महामार्गासाठी चालकांचीही भूमिका महत्त्वाची
महामार्गावरील सुरक्षा ही केवळ पोलिस यंत्रणेची जबाबदारी नसून प्रत्येक वाहनचालकाचीही तितकीच महत्त्वाची भूमिका आहे. द्रुतगती मार्गावर वाहन चालविताना वेगावर नियंत्रण ठेवणे, सुरक्षित अंतर राखणे, लेन शिस्त पाळणे, योग्य पद्धतीने ओव्हरटेक करणे आणि वाहन चालविताना पूर्ण एकाग्रता ठेवणे आवश्यक आहे.
112 दिवसांचा मृत्यूविरहित प्रवास ही केवळ एक आकडेवारी नसून, अपघात प्रतिबंधासाठी सातत्याने राबविण्यात आलेल्या विविध उपाययोजनांची सकारात्मक नोंद आहे. ही सुरक्षिततेची वाटचाल पुढेही कायम ठेवण्याचे आव्हान आता महामार्ग पोलीस आणि वाहनचालकांसमोर आहे.
Be First to Comment