रोहा तालुक्यात शिवसेनेची दमदार वाटचाल; युवासेनेच्या तालुका व शहर प्रमुखपदी रोशन पवार, राहुल गुरव

रोहा:समीर बामुगडे

रोहा | प्रतिनिधी : रोहा तालुक्यात शिवसेनेची संघटनात्मक ताकद दिवसेंदिवस वाढत असून, पक्षाने आता युवाशक्तीला संघटित करण्यावर विशेष भर दिला आहे. शिवसेना मुख्य नेते तथा मुख्यमंत्री ना. श्री. एकनाथजी शिंदे यांच्या नेतृत्वाखाली रोहा तालुक्यात पक्षबळकटीकरणाला वेग आला असून, युवासेनेच्या नव्या पदाधिकाऱ्यांच्या नियुक्तीमुळे संघटनेत नवचैतन्य निर्माण झाले आहे.

रायगड जिल्ह्याचे पालकमंत्री ना. श्री. भरतशेठ गोगावले, अलिबाग-मुरुड विधानसभा मतदारसंघाचे आमदार श्री. महेंद्रशेठ दळवी तसेच युवासेना कोअर कमिटी सदस्य, कोकण विभाग सचिव आणि रायगड जिल्हा परिषद सदस्य श्री. विकास भरतशेठ गोगावले यांच्या विशेष उपस्थितीत व मार्गदर्शनाखाली रोहा तालुक्यातील युवासेनेच्या नवीन पदाधिकाऱ्यांची अधिकृत घोषणा करण्यात आली.

यामध्ये श्री. रोशन धर्मा पवार यांची युवासेना तालुका प्रमुख, रोहा तर श्री. राहुल मनोज गुरव यांची युवासेना शहर प्रमुख, रोहा शहर म्हणून नियुक्ती करण्यात आली आहे. या नियुक्त्यांमुळे रोहा तालुका आणि शहरातील युवासेनेच्या संघटनात्मक विस्ताराला मोठी चालना मिळण्याची अपेक्षा व्यक्त होत आहे.

वंदनीय हिंदूहृदयसम्राट शिवसेनाप्रमुख बाळासाहेब ठाकरे यांच्या विचारांचा वारसा पुढे नेत धर्मवीर आनंद दिघे यांच्या शिकवणीनुसार तळागाळातील तरुणांना संघटित करण्याची जबाबदारी या दोन्ही युवा पदाधिकाऱ्यांवर सोपविण्यात आली आहे. आगामी काळात युवकांचे प्रश्न, रोजगार, शिक्षण, सामाजिक उपक्रम आणि स्थानिक पातळीवरील विविध प्रश्नांसाठी युवासेना अधिक आक्रमकपणे काम करणार असल्याचे संकेत या नियुक्त्यांमधून मिळत आहेत.

नवनियुक्त तालुका प्रमुख रोशन पवार आणि शहर प्रमुख राहुल गुरव यांनी मुख्यमंत्री एकनाथ शिंदे, पालकमंत्री भरतशेठ गोगावले, आमदार महेंद्रशेठ दळवी आणि विकास गोगावले यांचे आभार मानले. रोहा तालुका व शहरात युवासेनेचे संघटन अधिक मजबूत करून सर्वसामान्य तरुणांच्या प्रश्नांसाठी सातत्याने आवाज उठविण्याचा निर्धार त्यांनी व्यक्त केला.

दरम्यान, रोहा तालुक्यात शिवसेनेच्या वाढत्या संघटनात्मक हालचालींमुळे आगामी काळात स्थानिक राजकारणात शिवसेनेची ताकद आणखी वाढण्याची शक्यता व्यक्त होत असून, नव्या नियुक्त्यांनंतर कार्यकर्त्यांमध्ये उत्साहाचे वातावरण निर्माण झाले आहे.