रोहा, दि. २७ : घरेलू कामगार संघ, संलग्न भारतीय मजदूर संघ, जिल्हा रायगड यांच्या वतीने आयोजित करण्यात आलेला कामगार मेळावा व विद्यार्थी गुणगौरव सोहळा उत्साहपूर्ण वातावरणात संपन्न झाला. घरेलू कामगार व त्यांच्या कुटुंबीयांच्या मोठ्या उपस्थितीत पार पडलेल्या या कार्यक्रमात 85 घरेलू कामगार आणि 68 विद्यार्थ्यांनी सहभाग नोंदविला.
कार्यक्रमात घरेलू कामगारांच्या 68 विद्यार्थ्यांना वह्यांचे वाटप करून त्यांच्या शैक्षणिक प्रगतीसाठी प्रोत्साहन देण्यात आले. तसेच विद्यार्थ्यांना शिक्षणाचे महत्त्व, करिअरच्या संधी आणि उज्ज्वल भविष्यासाठी आवश्यक मार्गदर्शन करण्यात आले. शिक्षणाच्या माध्यमातून समाजात सक्षम नागरिक घडविण्याचा संदेश यावेळी देण्यात आला.
कार्यक्रमाच्या प्रमुख पाहुण्या म्हणून कु. वनश्री शेडगे, नगराध्यक्षा, रोहा नगरपालिका उपस्थित होत्या. त्यांनी घरेलू कामगारांच्या मुलांच्या शिक्षणासाठी राबविण्यात येणाऱ्या या उपक्रमाचे कौतुक करत विद्यार्थ्यांनी शिक्षणाच्या बळावर मोठी स्वप्ने पूर्ण करावीत, असा प्रेरणादायी संदेश दिला.
या उपक्रमासाठी श्री महेश वाडकर, विभाग प्रमुख, धाटाव, नवनिर्माण सेना, महाराष्ट्र राज्य यांनी विशेष सहकार्य केले. त्यांच्या हस्ते विद्यार्थ्यांना वह्यांचे वितरण करण्यात आले.
यावेळी श्रीमती निर्मला भूतकर, उपाध्यक्ष, महाराष्ट्र प्रदेश, घरेलू कामगार संघ (भारतीय मजदूर संघ), श्री अशोकजी निकम, रायगड जिल्हा सचिव, तसेच ज्येष्ठ कार्यकर्ते अजित तलाठी, विकास सुतार, शुभांगी बाकडे, भारती आंग्रे, रश्मी खांडेकर, राजश्री धिडे, नलिनी भोसले, चेतन देशमुख आणि मनोज शेडगे यांची प्रमुख उपस्थिती लाभली.
कार्यक्रमाला शिवसेना शहरप्रमुख प्रकाश कोळी तसेच सिंधांत भूतकर यांनी भेट देऊन शुभेच्छा व्यक्त केल्या. त्यांनी घरेलू कामगारांच्या मुलांच्या शिक्षणासाठी राबविण्यात येणाऱ्या या समाजोपयोगी उपक्रमाचे कौतुक करत अशा उपक्रमांना समाजाचा अधिकाधिक पाठिंबा मिळावा, अशी अपेक्षा व्यक्त केली.
यावेळी आयोजकांनी घरेलू कामगारांच्या मुलांच्या शैक्षणिक, सामाजिक आणि सर्वांगीण विकासासाठी भविष्यातही अशा विविध उपक्रमांचे सातत्याने आयोजन करण्यात येणार असल्याचे सांगितले. उपस्थितांनी या उपक्रमाचे उत्स्फूर्त स्वागत करत भारतीय मजदूर संघ व घरेलू कामगार संघाच्या समाजहिताच्या कार्याचे मनापासून कौतुक केले.
Be First to Comment