पनवेल, दि. २६ (वार्ताहर) : टाटा मेमोरियल हॉस्पिटल, खारघर येथील शिवसेना श्रमिक राष्ट्रीय कामगार सेनेच्या कार्याध्यक्षपदी सचिन कृष्णाजीराव मोरे यांची नियुक्ती करण्यात आली. नियुक्तीपत्र प्रदान समारंभ शिवसेना मुख्य सचिव संजय मोरे यांच्या हस्ते पार पडला.
यावेळी महाराष्ट्र प्रदेश कार्याध्यक्ष बाळासाहेब चव्हाण, टाटा मेमोरियल हॉस्पिटल युनियनचे अध्यक्ष दिनेश चावरा, तसेच संघटनेचे पदाधिकारी व कार्यकर्ते उपस्थित होते.
संघटनेचे प्रदेश सचिव अमित राजेंद्र भटनागर यांनी नियुक्तीपत्राद्वारे सचिन मोरे यांच्या नियुक्तीची घोषणा केली. नियुक्तीपत्रात कामगारांच्या हक्कांचे संरक्षण, त्यांच्या कल्याणासाठी सातत्याने कार्य करणे, संघटना अधिक मजबूत करणे तसेच शिवसेना श्रमिक राष्ट्रीय कामगार सेनेचे विचार प्रभावीपणे कामगारांपर्यंत पोहोचविण्यासाठी प्रामाणिकपणे काम करण्याच्या सूचना करण्यात आल्या आहेत.
यावेळी नवनियुक्त कार्याध्यक्ष सचिन मोरे यांनी वरिष्ठ नेतृत्वाने दाखविलेल्या विश्वासाबद्दल कृतज्ञता व्यक्त केली. कामगारांवरील अन्यायाविरुद्ध ठामपणे लढा देत त्यांच्या हक्कांसाठी सातत्याने संघर्ष करण्याची ग्वाही त्यांनी दिली. तसेच मुख्यमंत्री एकनाथ शिंदे यांच्या नेतृत्वाखाली संघटना अधिक बळकट करून टाटा मेमोरियल हॉस्पिटलमधील कामगारांचे प्रश्न प्राधान्याने सोडविण्यासाठी कटिबद्ध राहणार असल्याचे त्यांनी सांगितले.
या नियुक्तीमुळे टाटा मेमोरियल हॉस्पिटल, खारघर येथील कामगारांच्या विविध प्रश्नांना अधिक प्रभावीपणे वाचा फोडली जाईल, अशी अपेक्षा कामगार वर्गातून व्यक्त होत आहे.
Be First to Comment