रायगड जिल्हा परिषदेवर पहिल्यांदाच भाजपचा अध्यक्ष; मंगेश वाकडीकर बिनविरोध

अलिबाग : रायगड जिल्हा परिषदेच्या अध्यक्षपदी भारतीय जनता पक्षाचे मंगेश रामचंद्र वाकडीकर, तर उपाध्यक्षपदी राष्ट्रवादी काँग्रेसचे मधुकर मारूती पाटील यांची बिनविरोध निवड झाली आहे. विशेष म्हणजे जिल्हा परिषदेच्या इतिहासात पहिल्यांदाच भाजपचा अध्यक्ष निवडून आल्याने ही निवडणूक लक्षवेधी ठरली आहे.

जिल्हा परिषद निवडणुकीत कोणत्याही पक्षाला स्पष्ट बहुमत मिळाले नव्हते. भाजपला १५, राष्ट्रवादी काँग्रेसला १६, शिवसेना (शिंदे गट) २१, शिवसेना (ठाकरे गट) ५ आणि काँग्रेसला २ जागा मिळाल्या होत्या. त्यानंतर भाजप, राष्ट्रवादी काँग्रेस आणि शिंदे गटाच्या शिवसेनेने एकत्र येत महायुतीची सत्ता स्थापन केली. अध्यक्षपदासाठी भाजपकडून पनवेलचे मंगेश वाकडीकर, तर उपाध्यक्षपदासाठी राष्ट्रवादी काँग्रेसकडून रोहा येथील मधुकर पाटील यांना उमेदवारी देण्यात आली होती.

जिल्हा परिषद अध्यक्ष व उपाध्यक्ष निवडीसाठी गुरुवारी (दि. १२) जिल्हाधिकारी कार्यालयातील नियोजन भवन सभागृहात विशेष सभा घेण्यात आली. या सभेत अपर जिल्हाधिकारी तथा पिठासीन अधिकारी सुनील थोरवे यांनी वाकडीकर आणि पाटील यांच्या बिनविरोध निवडीची घोषणा केली.
या वेळी राज्याच्या महिला व बालकल्याण मंत्री आदिती तटकरे, आमदार प्रशांत ठाकूर, आमदार महेश बालदी, माजी खासदार धैर्यशील पाटील, माजी आमदार अनिकेत तटकरे, अ‍ॅड. आस्वाद पाटील, वैकुंठ पाटील, चित्रा पाटील, मानसी दळवी यांच्यासह अनेक पदाधिकारी व कार्यकर्ते उपस्थित होते. निवडीची घोषणा होताच उपस्थित कार्यकर्त्यांनी घोषणाबाजी व जल्लोष करत आनंदोत्सव साजरा केला.

सत्तेचे गणित बसवत असताना महायुतीतील तीन घटक पक्षांना एकत्र आणण्याचे शिवधनुष्य पेलणे जीकरीचे होते. अखेरीस अध्यक्ष पदाचा फॉर्मुला ठरला असल्याचे सूत्रांकडून समजते. भाजप १ वर्ष तर पुढील टप्प्यात दीड आणि मग अडीच असा अन्य अध्यक्षांचा कार्यखंड राहण्याची शक्यता आहे.