जेएसडब्ल्यू कंपनीच्या विस्तारात तरुणांना रोजगाराची संधी तर २२ तारखेच्या जनसुनावणीकडे साऱ्यांचे लक्ष

पेण दि. १८ ( प्रतिनिधी) -:: पेण तालुक्यातील वडखळ परिसरात असणाऱ्या जेएसडब्ल्यू कंपनीच्या (फेज ३) या विस्तारात या भागासह रायगड जिल्ह्यातील असंख्य बेरोजगार तसेच उच्चशिक्षित तरुणांना रोजगाराची संधी उपलब्ध होणार असून या विस्ताराची २२ तारखेला जन सुनावणी होत असल्याने याकडे साऱ्यांचे लक्ष लागून राहिले आहे.

गेल्या अनेक वर्षापासून येथे स्थापन झालेल्या जेएसडब्लू कंपनीच्या विविध प्लांट मध्ये तालुक्यातील वडखळ, गडब, डोलवी, वाशी, शिर्की, बोरी यासह झोतीरपाडा या विभागातील तसेच अलिबाग तालुक्यातील कंपनीच्या क्षेत्रात समाविष्ट झालेल्या शेतकऱ्यांच्या मुलांना कंपनीने समाविष्ट केले असून हजारो बेरोजगार आणि उच्चशिक्षित तरुणांना सुद्धा कंपनीने रोजगार दिला आहे.

यातच आजतागायत जेएसडब्ल्यू कंपनीच्या सीएसआर फंडाच्या माध्यमातून गावांमध्ये पाण्याची पाईपलाईन, तलावासाठी संरक्षण भिंत, शौचालये, खारबंदिस्ती, शाळेसाठी निधी, तलावातील गाळ काढणे,जलशुद्धीकरण,उन्हाळ्याच्या पाणीटंचाईत टँकर पुरवठा, कृषीकरीता फळ लागवडसाठी शेतकऱ्यांसाठी विविध योजना, महिला बचत गटांसाठी निधी, आपत्कालीन परिस्थितीत रुग्णवाहिका तसेच संजीवनी सारख्या हॉस्पिटलची उभारणी यासह अनेक विकास कामांमध्ये कंपनीने हातभार लावला आहे.त्यामुळे जेएसडब्ल्यू कंपनीच्या होणाऱ्या विस्तारीकरणात पुन्हा येथील हजारो युवक कंपनीमध्ये रोजगाराच्या माध्यमातून समाविष्ट होणार आहेत त्यामुळे अनेक गावातील नागरीकांनी या पेज ३ ला सहमती दर्शविली असल्याने येत्या २२ ऑगस्ट रोजी होणाऱ्या जनसुनावणी कडे साऱ्यांचे लक्ष लागून राहिले आहे.