मोकाट गुरांमुळे वाकण – पाली मार्गावरील वाहन चालक त्रस्त

सिटी बेल लाइव्ह / नागोठणे (महेश पवार) :

सद्यपरिस्थितीत मुंबई -गोवा महामार्गावर तसेच वाकण-पाली मार्गावर मोकाट गुरांचा सुळसुळाट असल्याचे चित्र पहावयास मिळत आहे. जणु काही या गुरांनी रस्त्यावर रास्ता रोकोच केला आहे. रस्त्यावरील मोकाट गुरांच्या वाढत्या संख्येमुळे वाहनचालकांना वाहन चालवतांना तारेवरची कसरत करावी लागत आहे.

या मोकाट गुरांच्या दिवसेंदिवस वाढत्या संख्येमुळे या गुरांना कोणी वाली आहे की नाही की, ही गुरे अशीच जाणूनबुजून रस्त्यावर मोकाट सोडुन देण्यात आली आहेत असा प्रश्न उपस्थित होत आहे. या गुरांचे कळपच्या कळप रस्त्यावर उभे असतात यांच्यामागे कोणीच गुराखी वैगरे दिसुन येत नाहीत. तसेच वाहनचालकांना जाण्यासाठी रस्ताच मोकळा नसल्यामुळे गाडीचा हाँर्न वाजवुन सुद्धा गुरे बाजुला होत नाहीत. शेवटी वाहनचालकाला गाडी उभी करुन गाडीतुन उतरून गुरांना बाजुला करावे लागत आहे. तसेच या उनाड गुरांच्या रस्त्याच्या मधेच बरेच वेळा झोंब्या होत असतात. या झोंब्यामुळे ही गुरे गाड्यांवर धडकत असल्याने अनेक गाड्यांना अपघात होऊन गाडीचे शो, इंडिकेटर पुर्णपणे तुटुन वाहनांचे मोठ्या प्रमाणात नुकसान झाल्याच्या घटना अनेक वेळा घडल्या आहेत.

त्यामुळे महामार्गावर मोठ्या प्रमाणात फिरणा-या उनाड गुरांचा बंदोबस्त संबधित ग्रामपंचायतीने करावा अशी मागणी वाहनचालकांतुन केली जात आहे.