४० डॉक्टरांच्या कलाकृती रसिकांना विनामूल्य पाहावयास मिळणार

नेहरू सेंटर आर्ट गॅलरीत नवी मुंबईतील प्रख्यात हृदयविकारतज्ञ डॉ. संजय तारळेकर यांच्या चित्रांचे प्रदर्शन

सिटी बेल | मुंबई |

गेल्या वीस वर्षात हजारो रुग्णांना वैद्यकीय सेवा देताना नवी मुंबईतील हृदयविकार तज्ञ डॉ. संजय तारळेकर यांनी लहानपणापासून हृदयाच्या एका कप्प्यात चित्रकला जपून ठेवली होती. हृदयविकार तज्ञ असल्यामुळे दर दिवशी त्यांना हृदयविकार असलेल्या रुग्णांवर उपचार करावे लागतात यावेळी शरीर व मनावर ताण हा येतच असतो अशावेळी हा मानसिक थकवा दूर करण्यासाठी अगदी लहानपणापासून जपलेली चित्रकला डॉ तारळेकर यांच्या मदतीला येत असते. वैद्यकीय क्षेत्रातील वाढत्या व्यापामुळे अनेक डॉक्टरांना आपला छंद जोपसता येत नाही व हि खंत आयुष्यभर राहते परंतु डॉ. संजय तारळेकर यांनी डॉक्टरी पेशा सांभाळून चित्रकलेची आवड जोपासली आहे. आपल्या मित्र मंडळींना भेट देताना ते नेहमी हाताने काढलेली पेंटिंग्स भेट देतात.

डॉ संजय तारळेकर यांच्या चित्रामध्ये निसर्गाची उधळण दिसून येते याविषयी सांगताना डॉ संजय तारळेकर म्हणाले, ” ज्या वेगाने आधुनिकीकरण होत आहे त्याच वेगाने निसर्गाचा विनाश होत आहे त्यामुळे निसर्ग वाचविणे ही आपल्या सर्वांची जबाबदारी आहे. फक्त झाडे लावून प्रश्न सुटणार नसून एकत्रित रित्या आपल्याला काम करावे लागणार आहे. मी काढलेल्या पेंटिंग या नेहमीच निसर्गाशी नाते जोडणाऱ्या असतात, या पेंटींगद्वारे निसर्ग जपण्याचा एक छोटा प्रयत्न मी करीत आहे”.

दिपकला फाऊंडेशन, स्वराज मीडिया व कुंदन फाऊंडेशन यांच्यावतीने चित्रकलेची आवड असलेल्या डॉक्टरांच्या रेखाटलेल्या चित्रकला, शिल्पकला तसेच फोटोग्राफीचे प्रदर्शन मुंबईतील नेहरू सेन्टर आर्ट गॅलरी इथे भरले असून ७ डिसेंबर ते १३ डिसेंबर पर्यत महाराष्ट्र, गोवा व कर्नाटक येथील ४० डॉक्टरांच्या कलाकृती रसिकांना विनामूल्य पाहावयास मिळणार आहेत.