शासकीय कार्यालयांच्या परिसरात सरपटणाऱ्या प्राण्याचा वावर

नागरीकांसह अधिकाऱ्यांच्या जिवीस धोका

सिटी बेल लाइव्ह / जेएनपीटी (अनंत नारंगीकर )

उरण तालुक्यातील जनतेच्या समस्यांचे निराकरण करणाऱ्या उरण तहसिल कार्यालय आणि उरण पोलीस ठाण्याच्या इमारतीच्या परिसराची स्वच्छता करण्यासाठी सार्वजनिक बांधकाम विभागाने दुर्लक्ष केल्याने इमारतीच्या परिसराला झाडा झुडपांनी वेढले आहे.सध्या पावसाचे दिवस असल्याने या परिसरात सरपटणाऱ्या प्राण्याचा वावर वाढला आहे.त्यामुळे या कार्यालयात ये- जा करणाऱ्या नागरीक, विद्यार्थ्यी, अधिकारी वर्गाच्या जीवीतास धोका निर्माण झाला आहे.
     उरण नगर परिषदेच्या हद्दीत असलेल्या शासकीय इमारतीत उरण तहसिल आणि उरण पोलीस ठाणे यांचे कार्यालय असून या कार्यालयातून शासकीय कामकाज हे गेली अनेक वर्षे सुरू आहे.त्यामुळे तालुक्यातील,इतर ठिकाणांहून अनेक नागरिक, शेतकरी, कामगार, विद्यार्थ्यी हे शासकीय कामकाजासंदर्भात तसेच आपल्या समस्यांचे निराकरण करण्यासाठी ये-जा करत असतात.अशा या इमारतीच्या छताला पावसाळ्यात गळती लागल्याने सार्वजनिक बांधकाम विभाग उरण येथील कार्यालयातील अधिकारी वर्गाने गळती थांबविण्यासाठी सदर इमारतीच्या छतावर ताळपत्री टाकण्याचे काम केले असल्याचे चित्र पाहावयास मिळत आहे.
     परंतु पावसाळ्यात या इमारतीच्या परिसरात वाढणारे गवत,साचणारी घाण दुर करण्याकडे उरण येथील सार्वजनिक बांधकाम विभागाचे अधिकाऱ्यांनी दुर्लक्ष केल्याने इमारतीच्या परिसरात गवत,झाडे झुडुपे वाढल्याचे चित्र समोर येत आहे.एकंदरीत गवत,झाडे झुडुपे आणि घाणीचे साम्राज्य वाढल्याने या परिसराचा ताबा हा सरपटणाऱ्या प्राण्यानी घेतला आहे. त्यामुळे या परिसरात वावरणाऱ्या नागरीक, विद्यार्थ्यी,अधिकारी,कर्मचारी यांच्या जीवितास धोका निर्माण झाला आहे.तरी संबंधित प्रशासनाने सदर इमारतीच्या परिसरातील गवत, घाणीचे साम्राज्य दुर करण्यासाठी पुढाकार घ्यावा अशी मागणी नागरिक करत आहेत.या संदर्भात सार्वजनिक बांधकाम विभाग उरण येथील कार्यालयाकडे विचारणा केली असता या कार्यालयाला वाळीच कोणी नसल्याचे स्पष्ट होत आहे.
     उरण तहसीलदार भाऊसाहेब अंधारे यांनी सांगितले की सदर इमारतीला पावसाळ्यात गळती लागली असता इमारतीच्या छतावर ताळपत्री टाकण्याचे काम केले आहे.तसेच परिसरात वाढणारे गवत, घाणीचे साम्राज्य दुर करण्यासाठी उरण येथील सार्वजनिक बांधकाम विभागाच्या अधिकाऱ्यांना सांगितले आहे.